Ish-deputeti i PS, pozitiv me COVID-19: Në pamundësi për t’iu përgjigjur mijëra mesazheve beteja me koronavirusin vazhdon…
Ish-deputeti i PS-së në Vlorë, Fatmir Toçi që prej 17 korrikut është infektuar me Covid-19 dhe tashmë ndodhet i shtruar në spitalin COVID2.
Ndërsa ka kaluar një javë që Toçi ka rezultuar pozitiv me koronavirus, me anë të një postimi në rrjetet sociale ka treguar gjendjen e tij shëndetësore. Ai e nis fjalën me mirënjohje, teksa shprehet se interesimi i miqëve e të afërmve ia ka bërë më të lehtë përballimin e kësaj situate.
Ndër të tjera ai ka informuar se gjendja e tij është e stabilizuar, por beteja me koronavirusin vazhdon.
Postimi i plotë:
Mirënjohje e falënderime:
Interesimi i të afërmve, miqve, të njohurve dhe dashamirësve të shumtë për gjendjen time shëndetësore, pas prekjes nga Covid-19 ma ka bërë më të lehtë përballimin e kësaj situate, si pjesë e rëndësishme e trajtimit shëndetësor që po përdoret, me sa duket deri tani, me sukses.
Në pamundësi për t’iu përgjigjur mijëra mesazheve dhe interesimeve të vazhdueshme në forma të tjera nga e gjithë bota, informoj se gjendja duket e stabilizuar, edhe pse beteja me Covidin-19 vazhdon dhe, me sa duket, do të zgjasë akoma.
Nuk di si t’ju falënderoj për forcën dhe kurajën që me keni dhënë në këto çaste të vështira për mua dhe familjen time, duke demonstruar vlerat e një shoqërie humane e të qytetëruar, siç ka qenë dhe është shoqëria shqiptare.
Mirënjohje dhe dashuri të pafund për personelin e Spitalit Universitar “Shefqet Ndroqi”, mjekë, specialistë e infermierë, profesionalizmi, kujdesi dhe humanizmi i të cilëve janë shfaqja më dinjitoze e misionit që kanë marrë përsipër dhe i kanë kushtuar jetën e tyre.
Çfarë të them për Prof. Perlat Kapisyzin, drejtorin e institucionit?! Disa njerëz janë lindur e formuar për të qenë misionarë me punën e tyre, me ndikim dhe kontribute te jashtëzakonshme në shoqëri, dhe do të thoja pa hezitim, ky është një nga rastet më të spikatur.
Zoti i ruajttë dhe u dhëntë forcë!
Shoqëria ka nevojë jetike për ata sot më shumë se kurrë, ashtu sikurse edhe ata kanë nevojë që të gjithë ne të jemi më të ndërgjegjshëm e më të përgjegjshëm përsa po ndodh realisht në të gjithë botën.
Fraksion.com
