Votimi i “5 qershorit”; Ndërkombëtarët: Nxisim të gjitha partitë politike të vazhdojnë diskutimet në Këshillin Politik

Bashkimi Europian mirëpret miratimin nga Parlamenti të ndryshimeve në Kodin Zgjedhor, në përputhje me marrëveshjen politike të arritur më 5 qershor.

Në një deklaratë për shtyp, ambasadori i delegacionit të BE-së në vendin tonë, Luigi Soreca thekson se kjo përmbush një nga kushtet kryesore për të filluar negociatat e anëtarësimit në BE, siç thuhet në konkluzionet e Këshillit të 25 marsit 2020.

“Dispozitat e reja legjislative do t’i japin Shqipërisë një kuadër zgjedhor me integritet dhe standarde transparence më të larta, bazuar në rekomandimet e OSBE/ODIHR-it”, u shpreh Soreca.

Ne, vijoi ambasadori, jemi në dijeni të propozimeve shtesë për reformën e sistemit zgjedhor.

“Ndërkohë që njohim rolin e Parlamentit në paraqitjen e ndryshimeve shtesë në lidhje me sistemin zgjedhor, ne nxisim të gjitha palët të vazhdojnë diskutimet në Këshillin Politik me të njëjtën frymë gjithëpërfshirëse dhe bashkëpunuese të treguar gjatë miratimit të marrëveshjes politike të 5 qershorit. Procesi që çon në ndryshimet shtesë nuk duhet të dëmtojë frymën dhe rezultatet e marrëveshjes së 5 qershorit”, deklaroi ambasadori i Bashkimit Europian në Tiranë, Luigi Soreca.

Zingraf: Hap i rëndësishëm në rrugën drejt konferencës së parë ndërqeveritare

Ambasadori i Gjermanisë në vendin tonë, Peter Zingarf përshëndeti sot miratimin nga Parlamenti të marrëveshjes së arritur më datë 5 qershor për ndryshime në Kodin Zgjedhor.

“Parlamenti shqiptar ka miratuar ditën e sotme ndryshimet në Kodin Zgjedhor dhe ka implementuar kësisoj marrëveshjen e 5 qershorit të negociuar mbi bazën e rekomandimeve të ODHIR-it në Këshillin Politik. Unë e përshëndes këtë hap të rëndësishëm në rrugën drejt konferencës së parë ndërqeveritare në kuadrin e bisedimeve të anëtarësimit në BE”, deklaroi ambasadori gjerman.

Në pikën e reformës zgjedhore të vendimit të tij të shtatorit 2019, theksoi Zingraf, Bundestagu gjerman fliste për një “dialog të hapur, ku të përfshihen të gjitha forcat politike“.

“Vendimi i Bundestag-ut është njohur nga të gjitha institucionet politike shqiptare në vend si një “Roadmap” për kalendarin shqiptar të reformave. Ndaj u bëj thirrje të gjithë aktorëve që në zbatim të marrëveshjes, por edhe në ndërmarrjen e të gjitha hapave të tjera, të vijojnë më tej me dialogun dhe gjithëpërfshirjen”, shprehet ambasadori gjerman.

Sipas tij, reformat e thella në Kodin Zgjedhor sipas standardeve të OSBE-së dhe Komisionit të Venecias kanë nevojë për një përgatitje të thelluar të realizuar brenda një kohe të mjaftueshme dhe mund të kenë efekt prapaveprues mbi marrëveshjen e implementuar ligjërisht tanimë.

Ambasada britanike: Marrëveshja ndihmon procesin zgjedhor dhe perspektivën e integrimit

Ambasada e Britanisë së Madhe përshëndeti miratimin e marrëveshjes së 5 qershorit për ndryshime në Kodin Zgjedhor në Parlament.

“Urime Parlamentit për miratimin e marrëveshjes së 5 qershorit, pas një periudhe të gjatë pune gjithëpërfshirëse, që ndihmon procesin zgjedhor dhe perspektivën e integrimit të vendit në Bashkimin Europian”, thuhet në deklaratën e shpërndarë në medie.

Çdo diskutim i mëtejshëm i reformave, vijon deklarata, duhet të jetë vërtet gjithëpërfshirës, me pjesëmarrjen aktive të të gjitha palëve.