“Siguria në plazhe prioritet”; Lleshaj inspekton Durrësin

Ministri i Brendshëm, Sandër Lleshaj shoqëruar nga Prefekti i Qarkut, Drejtori i Përgjithshëm i Policisë së Shtetit, drejtues Vendorë e të Kufirit të Policisë, zhvilloi një inspektim të masave për mbarëvajtjen e sezonit veror e të sigurisë në zonat me plazhe, si dhe masave për parandalimin e përhapjes së epidemisë COVID-19.

Sipas tij, duhet mobilizim për zbatimin e kërkesave të autoriteteve shëndetësore kundër COVID-19, duke kryer inspektime të përbashkëta të të gjitha agjencive. Ai tha se duhet ndërhyrje e fortë për të ndëshkuar ata që me papërgjegjshmëri rrezikojnë të tjerët.

“Po ndjekim sot në Durrës masat e marra nga organet shtetërore në përballim të situatës COVID-19 dhe për sezonin turistik. Masat për zbatimin e kërkesave të autoriteteve shëndetësore kundër COVID-19, përbëjnë prioritet të madh për të gjithë institucionet, për Policinë e Shtetit veçanërisht.”, tha Lleshaj.

Duke vleësuar “mobilizimin e mirë nga të gjitha institucionet” lleshaj tha se “mbetet me rëndësi vijimi i angazhimit për arsye se na duhet të ndërpresim me çdo kusht zinxhirët e përhapjes së mëtejshme të virusit. Këtu kërkohet sensibilizim, por kërkohet edhe ndërhyrje e fortë e autoriteteve për të ndëshkuar të gjithë ata që me papërgjegjshmëritë e tyre rrezikojnë të tjerët. Kjo punë do të vazhdojë me intensitet.”, tha ai.

Duke folur për  masat për mbarëvajtjen e sezonit turistik, ai theksoi rëndësinë që ka kujdesi për qetësinë e pushuesve sidomos në orët e mbrëmjes, kur muzika shndërrohet në faktor shqetësues dhe kontaminues, shndërrohet në një lloj virusi të dytë. “Për këtë Policia e Shtetit ka marrë masa të plota për të goditur çdo rast papërgjegjshmërie. tha Lleshaj.

“Policia e Shtetit duhet të marrë masa dhe do të marrë masa, ashtu edhe sikundër i ka marrë, për të goditur cilindo që me papërgjegjshmëri, ose në shërbim të oreksit të tij për të bërë para, shkatërron ose dëmton shëndetin dhe qetësinë e të tjerëve.”, tha ai.

“Në këtë pikë detyrat për Policinë janë të qarta, jo thjesht gjobë, por sekuestrim të gjithë impianteve që prodhojnë zhurmë për qytetarët e procedim për të gjithë ata që bëhen shkak për këtë ndotje jo vetëm akustike”, shtoi Lleshaj.

“Një çështje tjetër me rëndësi për të cilën Policia duhet të angazhohet fort është siguria në ujë dhe në rërë. Është për t’u theksuar me kënaqësi që masat këtë vit janë më të mira. Disiplinimi i vendosjes së operatorëve që përdorin plazhin është në nivelin e duhur, por kërkohet thellim i masave për sigurinë. Operatorët që shërbejnë në rërë ose në ujë marrin pará nga qytetarët, jo për ujin, as për rërën; – ata nuk shesin as ujin, as rërën, sepse rëra dhe uji janë pronë e qytetarëve, ata shesin shërbimin e tyre. Shërbimi i parë që duhet të shesin është siguria, jo shezlongu, por siguria.”,- tha Lleshaj.

“Kjo do të thotë që çdo operator që përdor një pjesë të bregdetit për qëllime të biznesit të tij, duhet që në paketën e ofertës të ketë sigurinë, duhet që të ketë rojet e plazhit, të ketë mjetet e shpëtimit, të ketë gjithë ato asete që duhen për të ofruar ndihmë ndaj qytetarëve dhe për të parandaluar me çdo kusht dëmtimin ose cenimin e jetës së qytetarëve në plazh.”, u shpreh ai.

“Një çështje tjetër po aq e rëndësishme, është ajo që ka të bëjë me motorët e ujit. Ndonëse këtu sot nuk shoh për fat të mirë, por kemi pasur në vijueshmëri sinjale dhe shqetësime nga qytetarët për raste ku persona të caktuar, krejtësisht të papërgjegjshëm, rrezikojnë jetën e tjerëve duke përdorur motorët e ujit. Motorët e ujit shërbejnë kryesisht për ndotje dhe jo për kënaqësi dhe prodhojnë një rrezik të shtuar për sigurinë e qytetarëve, të cilët duan të shijojnë ujin e detin tonë. Në këtë drejtim Policia e Shtetit e ka marrë detyrë dhe ka filluar zbatimin e një plani masash, i cili do t’i trajtojë me shumë rreptësi rastet e papërgjegjshmërisë nga personat që përdorin motorët e ujit.”,- tha ministri i Brendshëm.

“Përgjithësisht dua të them që për motorët e ujit ka ‘klimë të keqe’ këtë vit në bregun shqiptar. Pra, ka shanse të mëdha që ata të penalizohen, që motorët të sekuestrohen, që personat që shkelin rregullat të mbajnë përgjegjësi të forta ligjore. E mira është, e me këtë rast këshilloj që të heqin dorë nga kjo lloj kënaqësie dembele dhe t’u drejtohen kënaqësive të tjera; le të notojnë, le të bëjnë sport, por mos të rrezikojnë qytetarët, sigurinë e tyre me motorë dhe mos të bëjnë ndotje të mëtejshme të ujit dhe të ajrit me përdorimin abuziv të këtyre mjeteve, të cilat nuk është se prodhojnë atë për të cilën ne kemi nevojë, qetësinë dhe pastërtinë.”,- tha Lleshaj.

Ministri Lleshaj  përveç Policisë, e cila “duhet dhe do të angazhohet fort në këtë punë”, ai ftoi të gjithë operatorët dhe  bizneset, që ushtrojnë veprimtari në bregdet që “të bashkohen në këtë përpjekje të përbashkët, sepse në fund të herës, e gjithë përpjekja e organeve shtetërore, e Policisë, e organeve të shëndetit publik, e të tjerëve, është në funksion të tyre.”

Fraksion.com