Partitë e koalicionit opozitar: Rama po na prish marrëveshjen për reformën zgjedhore
Partitë e koalicionit opozitar akuzojnë kryeministrin, Edi Rama se po prish marrëveshjen për reformën zgjedhore. PD, LSI dhe aleatët e tjerë të opozitës së bashkuar i cilësojnë veprimet e kreut të qeverisë rrezik për stabilitetin e vendit. Në një deklaratë të përbashkët për mediat theksohet se, thuhet se për tentativën e mazhorancës për të ndryshuar Kushtetutën, kanë informuar partnerët ndërkombëtare pasi veprime të tilla do të fusnin “Shqipërinë në një kurs zhvillimesh të paparashikueshme”.
“Opozita e Bashkuar dënon me forcë tentativën e Edi Ramës për prishjen e Marrëveshjes së 5 Qershorit për Reformën Zgjedhore. Ky akt i paprecedentë prish konsensusin e arritur me ndërmjetësimin dhe mbështetjen e partnerëve tanë strategjikë SHBA dhe BE, vë në rrezik stabilitetin e vendit, si dhe dëmton seriozisht shanset e Shqipërisë për nisjen e negociatave të anëtarësimit me Bashkimin Europian. Ky veprim diabolik po kryhet vetëm për pushtetin personal të Edi Ramës dhe motivohet prej frikës së tij nga zgjedhjet. Ai dëmton rëndë interesat e qytetarëve shqiptarë, të cilët janë braktisur dhe tradhëtuar nga kryeministri në ikje, duke i lënë të vetëm përballë krizës më të thellë të pandemisë dhe atë ekonomike që është pasojë direkte e dështimit dhe papërgjegjshmërisë së tij dhe qeverisë së tij”, thuhet në deklaraën për mediat.
Duke u pozicionuar kundër çdo ndryshimi jashtë marrëveshjes së arritur në fillim të qershorit me ndërmjetësimin e ambasadores së SHBA, BE dhe Britanisë, opozita kërkon miratimin pa ndryshime në Parlament të paktit të arritur më 5 qershor.
“Kurrë më parë nuk ka ndodhur që të ndryshohet Kushtetuta e Shqipërisë dhe rregullat e lojës së një gare elektorale në mënyrë të njëanshme dhe pa konsensus mes palëve pjesëmarrëse në zgjedhje. Ky provokim i ulët dhe sjellje tipike prej autokrati që ka frikë nga zgjedhjet e lira e të ndershme, synon të nxisë konflikt politik në vend në prag të zgjedhjeve të ardhshme, që janë kyçe për demokracinë dhe ecurinë e Shqipërisë në rrugën e saj europiane.
Opozita e Bashkuar ka informuar zyrtarisht gjatë ditës së sotme Presidentin e Republikës dhe partnerët tanë strategjikë për këtë akt të paprecedentë që acaron më tej klimën politike në vend dhe e fut Shqipërinë në një kurs zhvillimesh të paparashikueshme. Opozita e Bashkuar ka qenë dhe mbetet plotësisht e angazhuar në përmbushjen e thirrjes së Sekretarit Amerikan të Shtetit, Mike Pompeo, Përfaqësuesit të Lartë të Bashkimit Europian, Joseph Borrel dhe Komisionerit për Zgjerimin, Oliver Varhelyi për kodifikimin pa ndryshime të marrëveshjes së 5 Qershorit, sa më shpejt në Parlament”, përfundon deklarata.
Kryeministri, Edi Rama ka deklaruar se, Partia Socialiste do të mbështesë hapjen e listave zgjedhore si një kërkesë e ardhur nga opozita parlamentare por edhe si një kërkesë e shumicës dërrmuese të qytetarëve. Gjithashtu në kërkesë e opozitës parlamentare është dhe ndalimi i koalicioneve parazgjedhore.
Fraksion.com
