Gjermania karantinë 14-ditore për shtetasit që udhëtojnë nga Shqipëria
Të gjithë ata shtetas që duan të udhëtojnë nga Shqipëria në Gjermani duhet t’i nënshtrohen karantinimit 14-ditor në Gjermani.
“Nëse këtë verë keni planifikuar një udhëtim nga Gjermania për në Shqipëri, ju lutemi që të merrni në konsideratë se Ministria e Jashtme Federale vazhdon të paralajmërojë mbi të gjitha udhëtimet jo të domosdoshme (përfshirë arsye pushimi, pushime në vendlindje, vizita familjare etj.) për në Shqipëri. Kjo vlen deri më 31 gusht 2020”, thekson Ambasada gjermane në Tiranë.
“Shqipëria kategorizohet aktualisht nga institucionet kompetente shëndetësore gjermane si rajon me rrezikshmëri për shkak të situatës epidemiologjike të COVID-19”, thuhet në njoftimin e Ambasadës.
“Nëse vendosni të udhëtoni jashtë vendit, përkundër paralajmërimit për udhëtim, ju lutemi të keni parasysh që ambasadat dhe konsullatat gjermane jashtë vendit mund t’ju ndihmojnë vetëm në një masë të kufizuar gjatë kthimit për në Gjermani, në qoftë se gjatë qëndrimit jashtë vendit vendosen kufizime të reja të udhëtimit dhe/ose masa për kufizime të jetës publike”, thekson Ambasada.
“Ju lutemi të merrni në konsideratë që në Shqipëri nuk garantohet një kujdes shëndetësor sipas standardeve gjermane, ndër të tjera ekzistojnë mundësi të kufizuara të testimit për COVID-19”, shton Ambasada.
“Nëse jeni duke udhëtuar nga Shqipëria për në Gjermani me rrugë ajrore apo tokësore me autobus ose automjete private jeni të detyruar që menjëherë pas kthimit të lajmëroni institucionin kompetent shëndetësor në vendin tuaj të banimit/qëndrimit në Gjermani dhe t’i nënshtroheni një vetizolimi/karantine shtëpiake prej 14 ditësh. Detyrimi për karantinë shtëpiake/vetizolim vlen për të gjithë nënshtetasit (edhe për ata gjermanë) dhe pavarësisht qëllimit të udhëtimit”, nënvizon Ambasada gjermane.
Ambasada thekson se, “gjatë kohës së karantinimit në shtëpi ju keni të drejtë të dilni nga banesa vetëm në konsultim dhe me leje të institucionit vendor shëndetësor. Një shkelje e këtij detyrimi mund të ketë për pasojë gjoba të larta. Nëse dhe eventualisht ku është e mundur të bëhet një test për COVID-19 pas hyrjes në Gjermani, i cili do të shkurtonte kohën e izolimit, edhe për këtë mund të informoheni tek institucioni kompetent shëndetësor në vendin tuaj të banimit/qëndrimit. Në dijeninë e Ambasadës gjermane, në Shqipëri aktualisht nuk ka laboratorë, të cilët kryejnë në varësi të dëshirës teste për COVID-19”.
Fraksion.com
