Një tjetër viktimë e “Ringjalljes”, refuzon ushqimin prej 6 muajsh, 52-vjeçarja: Do bëhem e pavdekshme!

Pas ngjarjes së Kombinatit që ka prekur shoqërinë tonë në mënyrë të paimagjinueshme, banorët e një pallati në Tiranë kanë njoftuar policinë në numrin pa pagesë duke vënë në dijeni se një grua tjetër, e cila jeton një kat më lart, ka ndërprerë ushqimin dhe nuk del më nga shtëpia.

Në një intervistë për gazetaren Anila Hoxha në Top Channel, nëna e Vjollcës (gruaja që beson në ringjallje), një inxhiniere ndërtimi, darkoi për herë të fundit natën e vitit të ri dhe më pas me justifikimin se kishte shqetësime në stomak ajo refuzoi ushqimin.

“Mora 129-ën, 129-a për 7 minuta i ka sjellë njerëzit këtu”, shprehet banori.

Gazetarja Anila Hoxha: Çfarë grupi ka frekuentuar?

“Grupin unë nuk e di, me gojëdhënat që janë thonë që janë me Jehovain”, deklaron ai.

“Dy kokrra mandarina në ditë ha, dy fije patatinë dhe një çikë djathë edhe ujë. Këto ka ngrënë ajo që tre muaj”, rrëfen e ëma.

Gazetarja Anila Hoxha: Po pse?

“Nuk më hahet thotë”, sqaron mamaja.

Ky është rrëfimi i nënës së Vjollcës, një inxhiniere ndërtimi, e cila darkoi për herë të fundit natën e Vitit të Ri dhe më pas me argumentin se është sëmurë ajo refuzon të ushqehet. E bindur në fjalën e të bijës, e moshuara këmbëngul se Vjollca është sëmurë, megjithëse shton se tre vite më parë familja ia ndaloi të frekuentonte një grup fetar.

“Ia ndërpreva unë.”

Gruaja kujton se një vit më parë dy persona deshën ta takojnë, por ajo i refuzoi.

“Ata ishin me pantallona blu dhe me këmishë të bardhë”, deklaron e ëma.

E shtrirë në krevat, Vjollca këmbëngul se është sëmurë ndaj nuk ushqehet dhe se pas njoftimit, policia i kontrolloi shtëpinë dhe madje e çuan edhe në spital.

Gazetarja Anila Hoxha: Çfarë ndodhi që e le ushqimin?

Vjollca: Jam sëmurë.

Gazetarja Anila Hoxha: Si e kuptove ti që kishe problem shëndetësor?

Vjollca: Jam shumë e sigurt, ky është problem mjekësor.

Gazetarja Anila Hoxha: A je me dëshmitarët e Jehovait?

Vjollca: Jam sëmurë, po ata persona vazhdojnë më kërkojnë, ata janë të interesuar, sepse muhabeti im në një farë mënyre ka marrë zgjidhje.

Gazetarja Anila Hoxha: Çfarë problemi kishe ti që prisje zgjidhje?

Vjollca: Prisja zgjidhje që të arrija një besim, me ata persona të arrija besimin tim.

Gazetarja Anila Hoxha: E arrite?

Vjollca: Besimi im në një farë mënyre është përhapur, tani ka ngelur te ata persona, se unë e ndjej veten shumë sëmurë. Unë hyra sepse pashë diçka të vërtetë në besimin e tyre, jo plotësisht në atë besimin e plotë që ata kishin, sepse ata besojnë në një farë ringjalljeje të vërtetë, jo vetëm frymore.

Gazetarja Anila Hoxha: Beson te ringjallja?

Vjollca: Besoj.

Gazetarja Anila Hoxha: Që kthehesh bashkë me trupin sërish?

Vjollca: Po kthehesh, po në një trup të përjetshëm.

Sipas një burimi të Top Channel-it, ky rast është referuar në prokurori, që do të vlerësojë nëse gruaja është vërtetë sëmurë apo po përdor justifikime për të bindur të afërmit se nuk ka motive të tjera që i di në fakt vetëm ajo./Top Channel

 

Fraksion.com