Vdes një ushtar amerikan në Kosovë

Departamenti amerikan i Mbrojtjes njoftoi se një ushtar amerikan, që shërbente në Kosovë, ka vdekur.

Ushtari Alexander Blake Klass, 20 vjeç, nga Uillamina e Oregonit, ka vdekur si “rezultat i një incidenti joluftarak më 4 korrik, në kampin në Novo Sellë, Kosovë”, thuhet në njoftim.

Sipas njoftimit, hetimet lidhur me këtë ngjarje kanë filluar.

Klass ishte pjesë e Batalionit 2, Regjimenti i 162-të i Këmbësorisë, Ekipi Luftarak i Brigadës së Këmbësorisë në Gardën Kombëtare të Oregonit, njoftoi Departamenti amerikan i Mbrojtjes.

Në Kosovë, në kuadër të misionit paqeruajtës të NATO-s, të njohur si KFOR, janë të angazhuar 640 ushtarë amerikanë, nga 4,000 trupa sa janë në total.

Muajin e kaluar u shënua përvjetori i 21-të i hyrjes së trupave të NATO-s që i dhanë fund luftës në Kosovë që la pas vetes mbi 10 mijë të vrarë e mijëra të zhdukur.

Mbi 200 pjesëtarë të forcave paqeruajtëse kanë humbur jetën gjatë shërbimit të tyre në Kosovë.

Fraksion.com