COVID-19: Turqia i jep ndihmë mjekësore Irakut
Më 30 qershor 2020, si pjesë e mbështetjes së aleatëve të NATO-s, në përgjigje të COVID-19, Turqia dërgoi furnizime kritike mjekësore për popullin Irakian, si një shenjë solidariteti midis dy vendeve fqinje.
Dorëzimi përbëhej nga ilaçe të ndryshme, ventilatorë, komplete testimi, maska N95, ndër të tjera dhe u transportua nga një aeroplan A400 i Forcave Ajrore Turke. Ndihma pason kërkesën për mbështetje nga Iraku përmes Qendrës Koordinuese Euro-Atlantike të NATO-s për Reagimin e Fatkeqësive (EADRCC).
EADRCC është mekanizmi kryesor i NATO-s për reagimin ndaj urgjencave civile. Qendra operon në baza 24/7, duke koordinuar kërkesat dhe ofertat e ndihmës. Që nga fillimi i krizës, ajo ka koordinuar kërkesa nga 16 vende të NATO-s dhe vende partnere, si dhe Zyra e Kombeve të Bashkuara për Koordinimin e Çështjeve Humanitare (OCHA), duke rezultuar në dhjetëra oferta ndihme. Deri më sot, Iraku ka marrë edhe ndihmë mjekësore nga Polonia, pas kërkesës për mbështetje përmes EADRCC.
NATO nisi Misionin e saj aktual në Irak në vitin 2018, me kërkesën e Irakut dhe pas vendimit nga drejtuesit e NATO-s në Samitin e Brukselit. Misioni i NATO-s në Irak është një mision këshillues, trainues dhe ndërtimi i kapaciteteve jo-luftarake, i kryer me respekt të plotë të sovranitetit dhe integritetit territorial të Irakut. Ai përfshin trajnerë, këshilltarë dhe personel ndihmës nga aleatët dhe vendet partnere, përfshirë Australinë, Suedinë dhe Finlandën. Ky Mision bazohet në arritjet e deritanishme të partneritetit midis NATO-s dhe Irakut.
Përpjekjet e vazhdueshme të NATO-s në Irak u theksuan gjithashtu në takimet e fundit të Ministrave të Mbrojtjes të NATO-s të mbajtura përmes video-konferencës në 17 dhe 18 qershor 2020.
Fraksion.com
