Integrimi; Rama: Është një sfidë që do na ndjekë deri në fund
Kryeministri Edi Rama deklaroi sot se Shqipëria është më afër objektivit madhor për të qenë vend i Bashkimit Evropian por pranoi se para ka ende detyra e sfida.
Nga tryeza e Këshillit Kombëtar të Integrimit, Rama tha se jemi të gatshëm për të hapur një faqe të re që kërkon dhe bashkëpunim, me synimin për ta bërë Shqipërinë një shtet me standardet e BE-së.
“Shumëçka tjetër bëhet më e vështirë edhe procesi vetë. Besoj që sot mund të thuhet se jemi në stad të ri, për sa kohë ajo që në mbledh këtu të diktuar dhe nga koha gjysmë reale e gjysmë virtuale është kuadri negociator, plani i masave për negocimin.
11 vite pas aplikimit dhe 6 vite pas marrjes së statusit kandidat jemi të gatshëm të hapim këtë faqe të re. Është një faqe me më shumë detyra, sfida që kërkon energji e bashkëpunim, por një gjë mund të thuhet pa ngurrim , që kur e shohim procesin jemi ende larg qëllimit final, por kur e kthejmë kokën pas shohim se sot jemi më afër se edhe një vit më parë.
Ky është një proces që ne na duhet si drita dhe si uji për të bërë Shqipërinë një shtet me standardet e BE. Është një proces që e bëjmë se e kërkon e ardhmja e fëmijëve tanë, është një proces shtet formimi. Ne jemi sot në një fazë tranzicioni, mes një vendi që aplikon dhe një vendi anëtar të BE, këmi një sërë sfidash, dhe një sërë reformash, që nga ajo e drejtësisë. Por është e qartë që gjithçka që sot bëjmë përbën një hap para për përfundimin me sukses të kësaj reforme. Është një sfidë që do na ndjek deri në fund”, tha Rama.
Fraksion.com
