Rama: S’kam ndërhyrë në punët e brendshme të Kosovës, kam folur për Kosovën

“Jam përpjekur të flas për Kosovën, jo në emër të Kosovës dhe kam hyrë në debat në Kosovë kur jam cenuar shumë rëndë nga ish-kryeministri i Kosovës”, deklaroi Kryeministri Edi Rama gjatë një emisioni televiziv në një nga mediet kosovare.

Kryeministri, po ashtu u shpreh i befasuar nga deklarata e zv.kryeministrit të Kosovës, lidhur me Teatrin Kombëtar.

“U befasova nga ajo çka kolegu juaj lexoi aty. Nuk e kam ndeshur deklaratën e zv.kryeministrit të Kosovës. Që zv.kryeministri i Shqipërisë apo kryeministri i Shqipërisë të thotë diçka që nuk i pëlqen kryeministrit, zv.kryeministrit apo qeverisë së Kosovës është në rregull të thotë një opinion. Që kryeministri i Kosovës të thotë që nuk jam dakord që Teatri Kombëtar të prishet, përsëri është në rregull. Unë e quaj problem kur ju në Kosovë thoshit që Edi Rama flet në emër të Kosovës. Unë jam përpjekur të flas për Kosovën, jo në emër të Kosovës dhe kam hyrë në debat kur jam cenuar rëndë nga ish-kryeministri i Kosovës. Por që zv.kryeministri i Kosovës apo kryeministri i Kosovës të bëjnë akuza, kjo është e rëndë, shumë e rëndë”, u shpreh Rama.

Këtë, theksoi Kryeministri, nuk e çoj në mend as në ëndrrën më të keqe.

“Çfarë duhet të them unë, që në veri të Kosovës në periudhën e pandemisë është zbatuar ligji dhe rregulli që zbatohet në Beograd? Unë vërtet me presidentin e Serbisë kam një marrëdhënie të hapur, edhe miqësore po të doni, por kurrë nuk e kam menduar që veriu i Kosovës do t’i nënshtrohej rregullave të Serbisë, 100%”, tha Rama.

Rama u pyet edhe për takimin e kërkuar prej kryeministrit të Kosovës për të diskutuar lidhur me COVID-19.

“Takimi i thirrur ishte nga formati i gabuar, në momentin e gabuar. Unë nuk doja të interferoja, as të bëhesha sfondi i askujt në kushtet kur në Prishtinë gjithë njerëzit kishin hallin e COVID-19, aty kishte filluar shkulja e “mustaqeve të Çelos””, u shpreh Kryeministri.

Ajo çka mua më ka lënduar me Ramushin, tha Rama, ka qenë gënjeshtra. Sipas tij, edhe ajo çka e ka lënduar me Kurtin, ka qenë gënjeshtra lidhur me teatrin.

“Albin Kurti ka shkuar edhe më larg, ka përmendur edhe Sllobodan Milosheviçin, duke bërë krahasime midis çfarë i bëri Sllobodan Millosheviçi Kosovës e monumenteve të kulturës dhe çfarë po i bëkam unë dhe qeveria ime asaj godine, që në fakt nuk ka qenë kurrë monument kulture”, deklaroi Rama.

Rama tha se ishte qeveria e Sali Berishës që ka marrë dokumente nga personalitete të fushës, që nuk janë socialistë, janë demokratë, ku shkruhet e zeza mbi të bardhë që nuk plotëson kushtet për të qenë monument kulture.

Fraksion.com