Në Vuhan shënohet një rast i ri me koronavirus

Qyteti kinez i Vuhanit, ku filloi shpërthimi i koronavirusit të ri, në fund të vitit të kaluar, ka raportuar edhe një rast të ri me COVID-19.

Ky është rasti i parë pas më shumë se një muaji.

Rasti është një nga 14 të infektuarit e ri të raportuar nga Komisioni Kombëtar i Shëndetit në Kinë.

Pacienti, një burrë 89 vjeç, është në gjendje kritike dhe më parë kishte qenë asimptomatik përpara se të dilte pozitiv në testin për koronavirus.

Vendi ku banonte ky burrë, është vënë nën kufizime të rrepta, raportojnë mediat lokale.

Kina ka raportuar gjithsej 82.901 raste të të infektuarve dhe 4,633 vdekje nga Covid-19, sëmundja që e shkakton koronavirusi i ri.

Presidenti amerikan, Donald Trump ka shtuar së fundmi kritikat kundër Kinës, duke thënë se ky shtet nuk ka bërë mjaftueshëm për të ndalur koronavirusin kur është shfaqur për herë të parë në Vuhan dhe Hubei.

Në Kinë këto akuza janë hedhur poshtë.

Shtetet e Bashkuara nuk janë të sigurta sa i përket origjinës së koronavirusit të ri, ka thënë më 6 maj, Sekretari amerikan i Shtetit, Mike Pompeo.

“Ne nuk jemi të sigurt, ndonëse ka të dhëna të rëndësishme që tregojnë se ka ardhur nga një laborator”, ka thënë ai.

Më herët, Pompeo ka thënë se ka parë “shumë të dhëna” se virusi ka ardhur nga një laborator në Vuhan.

Fraksion.com