NATO: Polonia dërgon mision mjekësor në Shtetet e Bashkuara

Ekipi prej nëntë anëtarësh do të vizitojë spitale të ndryshme në Chicikago gjatë misionit të tyre javor, dhe do të shkëmbejë njohuritë e tyre përmes seminareve dhe konferencave online me institucionet mjekësore, përfshirë Spitalin John H. Stroger, Cermak Health – Cook County dhe Qendrën Mjekësore Universitare Rush. Mjekët polakë gjithashtu do të punojnë së bashku me homologët e tyre amerikanë për të trajtuar pacientët në Qendrën e Konventave McCormick Place, spitali më i madh fushor në qytet.

Zëdhënësja e NATO-s Oana Lungescu përshëndeti misionin, duke thënë: “Aleatët e NATO-s qëndrojnë në solidaritet për t’iu përgjigjur pandemisë COVID-19. Duke punuar së bashku, kombet tona kanë ndihmuar njëri-tjetrin për të shpëtuar jetë, përfshirë këtu edhe shkëmbimin e ekspertizës mjekësore. Misioni mjekësor polak në Chicikago tregon edhe një herë se në përballjen me sfidat globale, ne jemi bashkë më të fortë. ”

Mjekët polakë nga Instituti Ushtarak i Mjekësisë, së bashku me kolegët e tyre nga Qendra Polake për Ndihmë Ndërkombëtare, më parë kanë ndihmuar mjekët në rajonin e Lombardisë së Italisë, dhe aktualisht janë gjithashtu duke punuar me mjekë sllovenë në Ljubljana.