“40 për qind e pasagjerëve do të presin 6 muaj për fluturime”
Në mbarë botën, 40 për qind e pasagjerëve përgatiten të presin të paktën gjashtë muaj ose më shumë për udhëtime ajrore për shkak të pandemisë globale të koronavirusit të ri (COVID-19), sipas një studimi të kryer të martën nga Shoqata Ndërkombëtare e Transportit Ajror (IATA).
Ndërkohë, 60 për qind parashikojnë se ata mund t’i kthehen udhëtimeve ajrore, një deri në dy muaj më vonë pasi të vihet në kontroll pandemia e COVID-19, thuhet në deklaratën e IATA-s.
“Vetëbesimi i pasagjerëve do të vuajë një përkeqësim të dyfishtë edhe pasi pandemia të vihet në kontroll, e goditur nga shqetësimet personale ekonomike përballë një recesioni të afërt mbi shqetësimet e vazhdueshme për sigurinë e udhëtimit”, tha në deklaratë Alexandre de Juniac, drejtori i përgjithshëm dhe drejtor ekzekutiv i IATA.
“Qeveritë dhe industria duhet të jenë të shpejta dhe të koordinuara me masa forcuese të besimit”, shtoi ai.
Në vendet ku rastet e reja të koronavirusit kanë rënë në nivele të ulëta, ka indikacione se pasagjerët po i kthehen sjelljes së tyre të udhëtimit në një mënyrë të kujdesshme, tha IATA, duke shtuar se “një kthim i menjëhershëm nga rënia katastrofike në kërkesën e pasagjerëve duket e pamundur”.
“Njerëzit ende duan të udhëtojnë”, tha de Juniac, duke shtuar: “Ndërsa vendet heqin kufizimet, masat për rritjen e besimit do të jenë kritike për rifillimin e udhëtimeve dhe për të stimuluar ekonomitë”.
“Biznesi i pasagjerëve u ndal me vendimet e njëanshme të qeverive për të ndaluar përhapjen e virusit. Rinisja e industrisë, megjithatë, duhet të ndërtohet me besim dhe bashkëpunim. Ne duhet të fillojmë ndërtimin e një kornize për një qasje globale që do t’u japë njerëzve besimin se ata kanë nevojë për të udhëtuar edhe një herë”, shpjegoi ai.
IATA tha se vlerëson se rreth 25 milionë vende pune në aviacion dhe zinxhirët e saj, duke përfshirë sektorin e turizmit, janë në rrezik për shkak të krizës së COVID-19.
Ndërsa të ardhurat e pasagjerëve pritet të jenë 314 miliardë dollarë, ose 55 për qind, më pak këtë vit sesa në vitin 2019, kërkesa në tremujorin e dytë të vitit 2020 vlerësohet të bjerë me 80 për qind ose më shumë, krahasuar me të njëjtën periudhë të vitit të kaluar, sipas IATA-s.
IATA përfaqëson rreth 290 linja ajrore që përbëjnë 82 për qind të trafikut global ajror, shkruan AA.
Fraksion.com
