BE dhuron 20 mijë teste kalibruese për COVID-19; Soreca: Jemi përkrah Shqipërisë

Bashkimi Europian i dhuroi Shqipërisë 20 mijë teste kalibruese në luftën kundër COVID-19.

Drejtoresha për Ballkanin Perëndimor në Komisionin Europian, Genoveva Ruiz Calavera, bëri të ditur se ky dhurim ka ardhur pas kërkesave të bëra nga Shqipëria, Bosnjë Hercegovina, Kosova dhe Maqedonia e Veriut.

“BE dhuron teste kalibruese pas kërkesës nga Institutet e Shëndetit Publik në Shqipëri, Bosnje Hercegovinë, Kosovë dhe Maqedoninë e Veriut. Janë dërguar sot. Së bashku më të fortë”, shprehet Calavera.

Ambasadori i Bashkimit Europian në Tiranë, Luigi Soreca reagoi pas këtij lajmi duke theksuar se Bashkimi Europian do të qëndrojë gjithmonë pranë Shqipërisë.

Këto teste kalibruese theksoi Soreca, i vihen në dispozicion Institutit të Shëndetit Publik në Tiranë.

“Sa më të besueshme janë testet, aq më efektive është lufta. BE do të jetë përkrah Shqipërisë“, deklaroi Soreca.