Akuzat për blerjen e pajisjeve mbrojtëse; Ministria e Shëndetësisë: PD të mos shpifë, por të bashkohet në frontin kundër COVID-19

Ministria e Shëndetësisë dhe Mbrojtjes Sociale i ka konsideruar akuzat e PD-së në lidhje me tenderin e blerjes së pajisjeve mbrojtëse në shëndetësi si shpifje.

Në deklaratën për mediet, Ministria e Shëndetësisë i bën thirrje Partisë Demokratike, të mos shpifë, por të bashkohet në frontin e luftës kundër COVID-19, për të mbrojtur bluzat e bardha.

“Në përgjigje të akuzave të radhës dhe të strategjisë së njohur të Partisë Demokratike “shpif, shpif, se diçka do mbetet”, kësaj radhe në drejtim të Ministrisë së Shëndetësisë dhe Mbrojtjes Sociale, për masat e shpejta që u morën për mbrojtjen e personelit shëndetësor, sqaron për publikun se procedurat për blerjen e materialeve të mbrojtjes personale për mjekët dhe infermierët gjatë kësaj epidemie, janë zhvilluar duke zbatuar legjislacionin në fuqi”, shprehet MSHMS.

Ministria e Shëndetësisë dhe Mbrojtjes Sociale i kërkon edhe një herë Partisë Demokratike të mos hedhë baltë mbi punën dhe sakrificën e specialistëve që punojnë ditë e natë në këtë ministri, në garë me kohën për të siguruar çdo mjet të nevojshëm në këtë luftë, që personeli mjekësor të jetë i mbrojtur dhe të punojë me standarde.

Po ashtu, Ministria e Shëndetësisë është e hapur për çdo hetim nga organet e drejtësisë, një orë e më parë. “Shpifjet e radhës nuk do e ndihmojnë dot Partinë Demokratike të dalë nga bataku ku e ka katandisur veten, në vend që sot të ishte shembull i një opozite konstruktive dhe bashkëpunuese”, thuhet në deklaratë.

Gjithashtu, Ministria e Shëndetësisë shton se “ka siguruar dhe do të vazhdojë të sigurojë – duke zbatuar ligjin dhe vetëm ligjin – mjetet e mbrojtjes personale për personelin mjekësor në këtë situatë pandemie, sepse prioritet i yni është mbrojtja e shëndetit të mjekëve, infermierëve dhe stafeve mbështetëse që ndodhen në vijën e parë të zjarrit, në këtë krizë të paprecedent”.