“Berisha synon të rishkatërrojë edhe një herë Shqipërinë”; Rama: Asnjë rezident jashtë nuk futet në kufi, të tjerët …

Kryeministri Edi Rama deklaroi sot se 19 automjetet në pikën kufitare të Kapshticës janë qytetarë, rezidentë në Greqi dhe nuk kanë asnjë arsye urgjente për të hyrë në territorin shqiptar.

“Në pikën kufitare të Kapshticës janë 19 makina të personave që janë banorë rezidentë në Greqi, të cilët nuk kanë asnjë urgjencë të posaçme, por kërkojnë të hyjnë për të takuar familjen”, informoi Kryeministri.

Në një kohë tjetër, tha ai, kjo që po them do të ishte absurde, por në këtë kohë është e vetmja rrugë që ne kemi që të dekurajojmë maksimalisht hyrjet në kufi.

“Nga ana tjetër kush bën patriotin, kush bën vajtimtarin për shkelje të të drejtave të njeriut, përmes pengesës që u krijohen njerëzve për të hyrë në atdheun e tyre, synon në nxisë katastrofën”, u shpreh Kryeministri Rama.

Nuk është sekret, vijoi Kryeministri, është fakt i njohur gjerësisht që Sali Berisha ka vetëm një synim, si e si të rishkatërrojë edhe një herë Shqipërinë për llogaritë e tij haluçinante.

“E solla këtu, këtë emër krejt të papëlqyeshëm për shumicën dërrmuese të shqiptarëve, si zanafillën e një procesi skandaloz politik për nxitjen e rrëmujës, në këtë rast nxitja e një zinxhiri vdekjeje”, deklaroi Rama.

Rama tha se nuk do të ishim larg këtij zinxhiri, nëse do të shkonim me mendjen e Saliut, e atyre që njësoj si Saliu, i bien këtij avazi që është i fajshëm në këtë kohë.

“Është e patolerueshme të nxiten njerëzit të të vijnë në kufi. Kufijtë janë të mbyllur për të mbrojtur jetën e atyre që janë këtej kufirit”, u shpreh Rama.

Kryeministri, më tej tha se qeveria ka vendosur që brenda 24 orëve të ardhshme të hyjë në një proces të ndërmjetëm dhe kush do të vijë në kufi tokësore me dokumente rezidence në vende të tjera, nuk do të lejohet të hyjë, në asnjë rast dhe për asnjë arsye.

Rama tha se mund të mundësojmë hyrjen për ata që janë vërtet me një arsye.

“Kush do të vij në kufi me pretendimet e një natyre tjetër, do të karantinohet për 14 ditë në struktura hoteliere me shpenzimet e veta. Do të marrë ushqimin dhe do të paguajë një çmim fiks. Karantinimi do të kontrollohet nga Policia e Shtetit dhe do të jetë e ndaluar dalja nga dhoma. Izolim i plotë ku s’ke kontakt fizik me të tjerët”, vuri në dukje Rama.

Kjo sipas tij, është e vetmja mënyrë që ne mund të mbrojmë popullin tonë, Shqipërinë nga katastrofa, dhe ata që vijnë.

Ardhja në Shqipëri, theksoi Kryeministri, nga shqiptarë rezidentë në vende të tjera, është papërgjegjshmëri ndaj vetes, familjes së atyre që marrin rrugën dhe ndaj vet vendit tonë.

Kryeministri shprehu po ashtu keqardhjen që disa media transmetuan si pamje live edhe pamjet e dy apo tre ditëve më parë në kufi.

Fraksion.com