“Tenderi i ushqimit, PD dorëzon në SPAK kallëzimin”; Xhaçka: Mirëpres hetimin; Opozita vazhdon me shpikje të modelit ‘Babale’
Partia Demokratike ka dorëzuar në SPAK kallëzim penal ndaj ministres të Mbrojtjes, Olta Xhaçka dhe kompanive pjesëmarrëse në tenderin e ushqimeve, duke i akuzuar për 6 vepra penale.
Akuzat lidhen me tenderin e ushqimit, ku PD akuzon ministren Xhaçka për abuzimin me 1.5 milionë euro. Në 6 veprat penale në kallëzimin e PD-së, përfshihen “Korrupsioni aktiv i personave që ushtrojnë funksione publike”, “Korrupsioni aktiv i funksionarëve të lartë shtetërorë”, “Shpërdorimit të detyrës”, “Shkelja e barazisë së pjesëmarrësve në tendera apo ankande publike”, “Korrupsioni pasiv i personave që ushtrojnë funksione publike”, “Korrupsioni pasiv i funksionarëve të lartë shtetëror”.Kallëzimi është firmosur nga Sekretari i Përgjithshëm i PD, Gazment Bardhi dhe në të thuhet se Ministria e Mbrojtjes duhet të argumentonte dhe të dokumentonte përzgjedhjen e kandidatëve që ka ftuar në këtë procedurë pa garë.
Sipas PD thuhet se “rezulton e provuar në dokumentet e tenderit, se ndryshe nga sa detyron ligji, mungon argumentimi se përse janë ftuar kompanitë e shpallura fituese “EUROVIA” shpknj dhe shoqëria XPERT SYSTEMS sh.p.k., në kushtet ku asnjëra prej tyre nuk është e specializuar në fushën e objektit të prokurimit, por kanë bërë shtimin e objektit të veprimtarisë vetëm disa ditë përpara hapjes së procedurës së prokurimit”. Gjithashtu, në kallëzim e PD shkruhet se “kompania “EUROVIA” shpknj, nuk përmbush kriterin ligjor të eksperiencës së ngjashme ne fushën e furnizimit me produkte ushqimore në 3 vitet e fundit.”
“Kjo kompani, ka shtuar në objektin e veprimtarisë së saj “tregtimin e ushqimeve”, vetëm 6 ditë përpara se të shpallej tenderi dhe për pasojë nuk ka asnjë eksperiencë në tregtimin e produkteve ushqimore. Në këtë rast, shkelja flagrante e ligjit faktohet nga përgjigja e dy pyetjeve të thjeshta: Si e identifikoi Ministria e Mbrojtjes kompaninë EUROVIA, që vetëm 6 ditë përpara tenderit kishte ndryshuar objektin e veprimtarisë, për t’i dërguar Ftesën për Ofertë në një tender pa garë dhe me negocim të drejtpërdrejtë? Çfarë eksperience kishte kjo kompani kompjuterësh në tregun e shitjes së ushqimeve, që u përfshi në listën e kompanive që duhet t’i dërgohej Ftesa për Ofertë”, thuhet mes të tjerave në kallëzimin e PD-së.
I menjëhershëm ka qenë reagimi i Ministres së Mbrojtjes, Olta Xhaçka, e cila e ka quajtur veprim të ulët dhe imoral në një kohë kur vendi është në luftë dhe PD-ja në vend të ndihmojë, krijojnë skenare si “Babale”. Ajo tha se është tashmë është e gjitha nga dorën e SPAK të zbardh të vërtetën.
“E mirëpres padinë e PD dhe e inkurajoj SPAK që ta hetojë me përparësi këtë akuzë sepse sot qytetarët kanë shumë nevojë për qartësi. PD ka të drejtë kur thotë që do të ishte veçanërisht e ulët e kriminale nëse një ministër do të përfitonte nga pandemia për të bërë korrupsion. Por është po aq e ulët e imorale në qoftë se opozita e një vendi në kohë lufte, jo vetëm s’kontribuon në përpjekjen e përbashkët për të mundur armikun e për të shpëtuar jetë, por vazhdon me shpikje të modelit ‘Babale’ në një përpjekje për të sabotuar luftën, e minuar përpjekjen tonë të përbashkët për t’i bërë ballë me sa më pak humbje e vuajtje armikut të padukshëm!
I takon SPAK të hedhë dritë mbi këtë çështje me të gjithë urgjencën që dikton situata e luftës ku jemi. Kemi bërë çdo gjë sipas ligjit e procedurës dhe jam optimiste se në fund të hetimit qytetarët do të kuptojnë qartë si drita e diellit se kjo akuzë s’është veç rivënia në skenë e versionit më të fundit të Babales”, deklaron Xhaçka.
Fraksion.com
