Rastet me koronavirus sot; Rama: Sfida, të mos dalë jashtë kontrollit nga marrëzitë tona

Rama tha se “me rezistencë të madhe popullore, mund të dalim nga kjo luftë me humbje e plagë të mëdha, por shumë më pak sidoqoftë se sa po nuk rezistuam”.

“Ju lutem si Krishtit e Muhametit mos luani me zjarrin dhe mos bëni një hap më shumë përtej kufijve që janë vënë për secilin”, tha ai.

Kryeministri tha se “nesër nis një ditë e re me sfidën e mosshkeljes së orareve; mosdaljes me asnjë tjetër në krah; moskrijimit të grumbujve në tregje e në dyert e dyqaneve”.

“Ju lutem mbani fëmijët brenda! Ju lutem mos lini pleqtë të dalin nga dera! Ju lutem ecni fillikat në rrugë pa u ndalur askund! Ju lutem rrini drejt e njëri pas tjetrit në radhë me durim! Ju lutem mos dilni poshtë pallatit! Ju lutem, ju lutem, ju lutem, mos merrni më qafë familjen dhe Shqipërinë me numra idioteskë në shkelje të rregullave të luftës”, tha Rama.

Ai u bëri thirrje qytetarëve të kuptojnë se sa e turpshme dhe kriminale është të na vdesin qindra e mos o Zot mijëra njerëz, për një pakicë të vogël fare që nuk reziston, po tradhëton”.

“Ju lutem njëmijë herë mos, mos, mos! Shteti po bën gjithçka mundet, forcat e rendit do bëjnë gjithçka munden, 99% e popullit po bën gjithçka duhet, prandaj ju që jeni pakica e pakicës, por jeni aq sa i duhen armikut për të na grirë si mish qeni, mos tradhtoni”, tha ai.

Në përfundim, Rama tha se do t’ju godasim pa asnjë tolerancë, por juve nuk duhet ta çoni punën aty! “Jemi të gjithë një familje dhe s’ka më turp në histori që të humbim një luftë si kjo, se nuk rrimë dot në shtëpi”, tha ai.