“Raportuesja për Kosovën: Presidenti Thaçi dhe LDK po duan ta grabisin pushtetin në kohë të koronavirusit”
Raportuesja për Kosovën në Parlamentin Evropian, Viola Von-Cramon u ka bërë thirrje LDK-së që të anulojë mocionin e votëbesimit ndaj qeverisë Kurti.
Gazeta Express ka pyetur raportuesen për Kosovën në PE Viola Von-Cramon pas postimit të saj sot në Twitter ku ka thënë se “mocioni i votëbesimit nga LDK-ja për qeverinë Kurti ku bënë pjesë edhe vet do të ishte katastrofal për Kosovën”.
Deputetja e Parlamentit Evropian ka deklaruar se LDK-ja dhe Presidenti Thaçi po duan që të shfrytëzojnë krizën e koronavirusit për të marrë pushtetin.
“Partneri I koalicionit në qeverinë e Kosovës, LDK-ja ka njoftuar se do të iniciojë mocion votëbesimi ndaj qeverisë Kurti e cila ka marrë detyrën para më pak se 50 ditë. Presidenti Hashim Thaçi gjithashtu dëshiron që të përdorë koronavirusin për të shpallur gjendjen e jashtëzakonshme jo vetëm që të fitojë më shumë pushtet por të shfrytëzojë këtë moment për të larguar nga pozita kryeministrin Albin Kurti”, ka thënë Von-Cramon.
Viola Von-Cramon, raportuesja për Kosovën në Parlamentin Evropian ka deklaruar se partnerët e koalicionit duhet ta konsiderojnë suspendimin e vendimit për mocion votëbesimi deri në përfundimin e krizës së pandemisë
“Presidenti Thaçi dhe partneri I koalicionit LDK-ja, janë duke e shfrytëzuar krizën e koronavirusit si pretekst për lojërat e tyre me pushtetin. Arsyeja e lidershipit të LDK-së për mocion votëbesimi ndaj qeverisë është e qartë që nuk është përgjigje e duhur se si të trajtojnë krizën aktuale. Ata duan të sigurohen që në instancat ndërkombëtare lideri legjitim I zgjedhur dhe kryetari I ekzekutivit, Albin Kurti të mos ketë mundësi të udhëheqë dialogun. Në periudhën e rrethanave të jashtëzakonshme dhe të mbylljes së kufijve, ku jeta politike është pezulluar në masë të madhe, partnerët e koalicionit duhet të të konisderojnë për suspendimin e vendimit për mocionin e votëbesimit deri në përfundimin e krizës së shëndetit publik”, ka thënë deputetja e Parlamentit Evropian.
Tutje, raportuesja për Kosovën ka deklaruar se është në interesin e Bashkmit Evropian dhe ShBA-së që Kosova të ketë një qeveri funksionale dhe stabile.
“Është në interesin vital të Bashkimit Evropian dhe të SHBA-së që Kosova të ketë një qeveri funksionale dhe stabile e cila deri tani ka shfaqur një vullnet të mirë për të bashkëpunuar me Beogradin dhe me akterët ndërkombëtarë. Ne nuk duhet të gabojmë, kriza është për atë se kush duhet të ulet në tavolinën e dialogut. Kjo gjë duhet të jetë detyrë e qeverisë dhe jo akterëve tjerë. SHBA-ja nuk duhet t’i qëndrojë mbi kokë qeverisë me qëllim të mbrojtjes së interesave të veta shkurtpamëse biznesore. Ne duhet të përpiqemi për stabilitet dhe përgjegjësi të qarta, jo për marrëveshje të errëta pas dyerve të mbyllura”, ka thënë Von-Cramon.
Fraksion.com
