Parlamenti i Kosovës miratoi buxhetin dhe rezolutën për bisedimet me Serbinë
Parlamenti i Kosovës, miratoi në një seancë të jashtëzakonshme buxhetin për vitin 2020, por pa praninë e deputetëve të opozitës.
Buxheti i këtij viti është 2 miliardë e 357 milionë euro dhe miratimi i tij u bë më procedurë të përshpejtuar, për shkak të situatës së krijuar pas konfirmimit të rasteve të para të infektimit me koronavirus.
Gjatë seancës për buxhetin parlamenti miratoi edhe një rezolutë në të cilën thuhet se qeveria e Kosovës është institucioni që ka mandatin për të udhëhequr bisedimet me Serbinë.
Në tekstin e rezolutës që u miratua po ashtu, pa praninë e opozitës, thuhet se “Sovraniteti shtetëror, integriteti territorial dhe karakteri shtetëror unitar i Republikës së Kosovës janë të pacenueshme. Askush nuk ka të drejtë të bisedojë, dialogojë apo negociojë për sovranitetin, integritetin territorial, rendin kushtetues dhe karakterin unitar të Kosovës”.
Në tekstin e rezolutës, që u lexua nga shefi i Grupit Parlamentar të Lidhjes Demokratike të Kosovës, Arben Gashi, thuhet se “në përputhje me aktgjykimin e Gjykatës Kushtetuese, është Qeveria e Kosovës që ka mandatin të udhëheqë bisedimet ose dialogun me Serbinë dhe të bëjë përgatitjet për negociata, e të negociojë lidhur me marrëveshjen e mundshme përfundimtare e cila do të përmbyllet me njohje reciproke me Republikën e Serbisë”.
Të dielën, kryetari i Partisë Demokratike të Kosovës, Kadri Veseli, akuzoi partitë në pushtet se organizuan seancë të jashtëzakonshme për buxhet, “duke abuzuar me shqetësimin e emergjencës qytetare për pandeminë e coronavirusit – tashmë të shpërndarë në disa cepa të vendit tonë, edhe për shkak të papërgjegjësisë së kësaj Qeverie në parandalimin e përhapjes së tij. Përjashtuan me dredhi opozitën nga vendimmarrja e një ligji kaq me rëndësi për qytetarët, si ky për buxhetin. Tradhtuan qytetarët me premtime, duke mos e përfshirë në buxhet, siç ishte paraparë, rritjen e pagave të sektorit shëndetësor dhe tërë sektorit publik. Dhe, pikërisht në kohën e izolimit e sanksioneve të SHBA-së mbi Shtetin e Kosovës, nuk u morën me problemin fundamental para vetes si sfidë – taksën, por menduan vetëm për vetveten, se si të takohen me përfaqësuesit serbë në Dialog, dhe për këtë nxorën Rezolutë pas mesnatës”, shkroi mes tjerash ai.
Ndërsa kryeministri Albin Kurti, shkroi se “sot me datë 15 mars 2020, është dashur që të hiqet tarifa 100% në lëndën e parë që importohet nga Serbia. Kjo nuk do të ndodhë sepse qëndrimi im i shprehur më 26 shkurt 2020 ndërkohë nuk u bë vendim. Më vjen keq për këtë. Ende nuk kam arritur ta bind partnerin tonë të koalicionit qeverisës, LDK-në, për atë që vetë jam i bindur: zëvendësimi gradual i tarifës me reciprocitetin është mënyra më e mirë, më e drejtë dhe më e dobishme”.
Lidhja Demokratike nuk është pajtuar me qëndrimin kryeministrit për heqjen e kushtëzuar të tarifave ndaj mallrave serbe, duke kërkuar që ato të hiqen tërësisht sipas kërkesës së Shteteve të Bashkuara, të cilat tashmë kanë pezulluar programe dhe kanë paralajmëruar sanksione të tjera nëse kjo nuk ndodhë.
Presidenti i Kosovës, Hashim Thaçi, i ka kërkuar qeverisë heqjen e tarifave dhe shfrytëzimin e përfshirjes amerikane për arritjen e një marrëveshjeje përfundimtare me Serbinë dhe kjo kërkesë u ritheksua edhe në takimin e tij të së premtes me kryeministrin Kurti.
