Meta letër Mattarellës: Masa e marra nga Italia, mjaft të rëndësishme edhe për të gjithë rajonin

Presidenti i Republikës, Ilir Meta mbështet masat e detyruara të marra me përgjegjësi të lartë shtetërore nga autoritetet italiane dhe i vlerëson këto masa si mjaft të rëndësishme jo vetëm për Italinë, por dhe për të gjithë rajonin

Presidenti Meta i ka dërguar sot një letër Presidentit të Republikës të Italisë, Sergio Mattarella, në të cilën shpreh solidaritetin e tij dhe të gjithë popullit shqiptar mbi situatën e krijuar së fundmi në vendin fqinj nga përhapja e virusit COVID-19, si dhe ngushëllimet për humbjet e jetëve nga ky virus.

Duke shprehur bindjen se përpjekjet e autoriteteve italiane për të izoluar këtë epidemi shpejt do të japin rezultate dhe do të kthejnë normalitetin në jetën e italianëve, Presidenti Meta nënvizon se angazhohet për të forcuar bashkëpunimin ndërmjet autoriteteve shëndetësore të të dy vendeve në përballimin e kërcënimit të kësaj epidemie.