Trump e zgjedh zëvendësuesin e Grenellit në krye të inteligjencës amerikane
Presidenti i Shteteve të Bashkuara, Donald Trump, ka zbuluar emrin e personit që ai synon ta ketë në krye të Inteligjencës Kombëtare amerikane.
Trump ka bërë të ditur se ka propozuar kongresistin John Ratcliffe për t’u bërë drejtor i Inteligjencës Kombëtare.
“Do ta kishim kompletuar procesin më herët, por Johni ka dashur të presim derisa të kryhej raporti i Inspektorit të Përgjithshëm”, ka shkruar Trump, në rrjetin social Twitter.
“John është burrë i jashtëzakonshëm, me talent të shkëlqyeshëm!”, është shprehur Trump.
I am pleased to announce the nomination of @RepRatcliffe (Congressman John Ratcliffe) to be Director of National Intelligence (DNI). Would have completed process earlier, but John wanted to wait until after IG Report was finished. John is an outstanding man of great talent!
— Donald J. Trump (@realDonaldTrump) February 28, 2020
Nëse aprovohet nga Senati amerikan për ta marrë detyrën e re, Ratcliffe do ta zëvendësojë ushtruesin e detyrës së shefit të Inteligjencës Kombëtare, Richard Grenell.
Presidenti Trump e kishte emëruar ditë më parë Grenellin si ushtrues detyre të drejtorit, në një hap që ishte kuptuar si përpjekje e tij për të blerë kohë për propozimin e tij përfundimtar për udhëheqës të inteligjencës amerikane.
Grenell është gjithashtu i dërguar i posaçëm i Trumpit për dialogun Kosovë-Serbi, dhe po ashtu ambasador i Shteteve të Bashkuara në Gjermani.
Fraksion.com
