“Kamioni me kokainë kaloi nga Shqipëria në Maqedoninë e Veriut”; Policia shqiptare: Ishim pjesë e aksionit

Policia e Shtetit ka kryer me sukses të plotë detyrimet e saj në kuadër të një operacioni ndërkombëtar kundër trafikimit të drogës.

Në përgjigje të interesimit të disa medieve, Policia e Shtetit sqaroi se: “Në operacionin që synonte dorëzimin e kontrolluar të një sasie të madhe kokaine, morën pjesë edhe strukturat e Policisë Shqiptare, të cilat mundësuan kalimin e dërgesës nga Mali i Zi nëpërmjet territorit shqiptar drejt Maqedonisë së Veriut, në kushte të plota sigurie dhe konfidencialiteti”.

“Ky operacion përbën një tjetër angazhim serioz të Policisë së Shtetit në luftën kundër krimit të organizuar ndërkombëtar dhe një dëshmi tjetër të besimit të partnerëve të saj në këtë luftë”, sqaroi Policia.

Një ditë më parë, është bërë e mundur kapja e 1.3 tonë kokainë në Maqedoninë e Veriut në një kamion me banane që ka hyrë dje nga Mali i Zi në Shkodër dhe ka dalë po dje nga dogana e Qafë-Thanës për në Maqedoni.

Policia shqiptare me një grup ekspertësh u përfshi me kërkesë të partnerëve ndërkombëtarë që kanë kërkuar ndjekjen e kamionit dhe vëzhgimin, teksa superaksioni ishte në zhvillim e sipër.

Fraksion.com