“48 orë për të shkuarën kriminale”; OFL u ‘vihet pas’ Plarent Dervishit dhe Suel Çelës
Operacioni Forca e Ligjit u ka kërkuar sot dy personave të tjerë me të shkuar kriminale që të deklarojnë origjinën e pasurive që kanë.
OFL sot u ka dërguar formularin për deklarimin e origjinës së pasurisë Plarent Dervishaj, me banim në Durrës, pasi rezulton në hetim në Gjermani për veprën penale “Trafik i qenieve njerëzore”. Ndërkohë personi i dytë që i është nisur kërkesë me shkrim për vetëdeklarimin e burimeve të pasurisë është Suel Çela, me banim në Elbasan, pasi rezulton i dënuar në Itali për trafikim narkotikësh.
Tashmë këta dy persona kanë 48 orë kohë që të justifikojnë pasurinë e tyre dhe duhet t’u përgjigjen me shkrim pyetjeve të OFL për të origjinën e të ardhurave.
” Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së. Më pas, përgjigjet e marra do t’i dërgohen SPAK-ut, i cili brenda jo më shumë se 15 ditësh, duhet të vlerësojë dosjen e përgatitur nga OFL-ja mbi aktivitetin kriminal të këtyre subjekteve, si edhe pasurinë e tyre. Sapo të bëjë këtë vlerësim, SPAK-u duhet t’i kërkojë Gjykatës Speciale masën e sekuestrimit për pasuritë e subjekteve dhe pas sekuestrimit, në jo më shumë se 6 muaj Gjykata Speciale duhet të vendosë për konfiskimin përfundimtar të tyre.
Me marrjen e masës së sekuestros, çdo pronë e subjekteve do të administrohet nga agjencia e posaçme. Vetëm banesa mund të vazhdojë të përdoret për strehim, por nuk mund të shitet apo të jepet me qira nga subjekti. Të gjitha subjektet e Ligjit Special, pra të gjithë të dënuarit apo të akuzuarit gjatë 30 viteve të fundit, për krimet e parashikuara në këtë ligj, do të kalojnë sitën e provës së ligjshmërisë së pasurisë së tyre. Asnjë përjashtim nuk do të ketë dhe nuk mund të ketë dhe çdo përpjekje për të tjetërsuar ndërkohë pronën, duke përdorur familjarë apo të njohur, do të rëndojë të dyja palët.
Kujtojmë se Ligji Special parashikon vlerësime dhe hetime specifike të pasurisë edhe për rrethin familjar të personave të dënuar apo akuzuar për krim të organizuar e krime të rënda.” njofton OFL.
Fraksion.com
