Kryesia shqiptare e OSBE-së, angazhim në promovimin e tolerancës dhe mosdiskriminimit

“Antisemitizmi është si një virus dhe si gjithë sëmundjet mund të kurohet vetëm nëse kryhet një diagnozë e saktë”, deklaroi sot Kryeministri Edi Rama në video mesazhin e mirëseardhjes në Konferencën e nivelit të lartë mbi Luftën kundër Antisemitizmit në rajonin e OSBE-së të organizua nga Kryesia Shqiptare e OSBE-së në Tiranë.

“Kjo konferencë është një thirrje për të qenë vigjilentë”, theksoi Kryetari i OSBE-së, Kryeministri Edi Rama në video mesazhin e mirëseardhjes për pjesëmarrësit e konferemcës.

Ai u drejtoi një thirrje konkrete vendeve pjesëmarrëse që së bashku me shoqërinë civile të veprojnë për të adresuar sfidat e antisemitizmit në rajonin e OSBE-së. “Antisemitizmi, tha Rama, është si një virus dhe si gjithë sëmundjet mund të kurohet vetëm nëse kryhet një diagnozë e saktë”.

Gjithashtu, Zëvendësministri Tare u ndal në kontributin shqiptar pёr shpëtimin e hebrenjve gjatë Luftës së Dytë Botërore, duke ju referuar vlerës së patjetërsueshme të shoqërisë shqiptare, tolerancës dhe bashkëjetesës së shkëlqyer fetare.

Në vijim, ai u shpreh se secili shtet pjesëmarrës mund kontribuojë dhe japë mbështetjen e tij në identifikimin e masave për adresimin e manifestimeve të dhunshme antisemitizëm si dhe të kontribuojë në luftën kundër antisemitizmit, intolerancës, ksenofobisë, racizmit, etj, për një të ardhme më të sigurt për të gjithë rajonin e OSBE-së.

Konferenca e nivelit të lartë, e cila shënon aktivitetin e parë të këtij lloji të Kryesisë Shqiptare, ofroi një mundësi për të dialoguar dhe diskutuar mes pjesëmarrësve mbi sfidat aktuale dhe praktikat e mira lidhur me luftën kundër antisemitizmit, duke shqyrtuar edhe mundësitë e ndërveprimit mes shteteve pjesëmarrëse të OSBE-së për të promovuar tolerancën dhe mos diskriminimin.

Konferenca gjithashtu trajtoi rolin e shoqërisë civile në adresimin e manifestimeve antisemitizëm si dhe rëndësinë e patjetërsueshme të programeve arsimore në ndihmë të luftës ndaj këtij fenomeni.

Në Konferencë morën pjesë delegacione zyrtare nga vendet pjesëmarrëse të OSBE-së, përfaqësues të organizatave ndërkombëtare dhe shoqërisë civile, etj.