“Plani i Presidentes së KE-së”; Rama: Përtej Konferencës së Donatorëve; Strategji konkrete për Negociatat

Në një përmbledhje të takimit të mbrëmshëm në Bruksel me Presidenten Ursula von der Leyen, Kryeministri Rama tha se “ndamë me Presidenten edhe idetë e financimit të rindërtimit, me një skenar shtesë pas konferencës”.

“Mbrëmë takuam presidenten e Komisionit Europian, një zonjë me një karrierë të admirueshme dhe njohje mbresëlënëse të çështjeve europiane, e cila bujarisht na mundësoi një bashkëbisedim shumë të hapur që zgjati përreth dy orë. Qëllimi parësor i vizitës siç edhe ju kam shkruar dje ishte adresimi i problematikës së pas tërmetit , me fokus Konferencën e Donatorëve që është thirrur pikërisht nga Presidentja e komisionit në Bruksel në 17 shkurt. Ishte një bisedë që në fillim kishte një pjesë të madhe informative dhe ne informuam për të gjitha aspektet e punës sonë në trajtimin e problematikës së pas tërmetit, që nga trajtimi i familjeve të prekura tek raporti i dëmeve që po finalizohet së shkruari në bashkëpunim me ekspertët e BE-së të OKB-së, Bankës Botërore, tek masterplani i rindërtimit dhe të gjitha planet vendore për të gjitha zonat e prekura, kalendari i gjithë këtij procesi dhe natyrisht dhe plani ynë i financimit të këtij operacioni masiv rindërtimi që po të shohim dëmet tejkalon mundësitë tona”, – tha Rama.

Kreu i qeverisë u shpreh se “më vjen shumë mirë të ndaj me ju një ndjesi shumë pozitive që kam nga vëmendja e veçantë dhe rëndësia që Presidentja e Komisionit i ka kushtuar në fakt që në ditën pas tërmetit e në vijimësi të gjitha aspekteve të kësaj problematike”.

“Takimi i mbrëmshëm ishte konfirmim i gatishmërisë së plotë dhe angazhimit konkret të saj për të mbështetur operacionin e rindërtimit. Serioziteti me të cilin po organizohet Konferenca e Donatorëve është maksimal dhe pavarësisht se ne e dimë shumë mirë që shuma e mundshme që mund të mbledhim në atë konferencë nuk do të përmbushë dot kurrsesi të gjithë nevojat”-, tha Rama .

Kryeministri u shpreh se “kaluam në temën e saj të preferuar përshpejtimin e procesit të çeljes së negociatave me Shqipërinë dhe Maqedoninë e Veriut. Më lejoni të mos zgjatem në këtë pikë të dytë, por është e sigurt që Presidentja e Komisionit ka një strategji konkrete për objektivin e çeljes së negociatave dhe ndërkohë është po kaq e sigurt se përsëri sidoqoftë fati i vendimit mbi çeljen e negociatave do të varet nga ecuria e debatit të brendshëm të Bashkimit Europian mbi vetveten dhe të ardhmen e të gjithë procesit të zgjerimit”.

Megjithatë, vijoi Rama, strategjia për negociatat është vetëm një pjesë e strategjisë së gjerë të Komisionit të ri dhe presidentes Ursula von der Lyen për nxitjen e bashkëpunimit dhe të zhvillimit rajonal në Ballkanin Perëndimor.

“Presidentja e Komisionit e sheh me entuziazëm realisht përpjekjen për ta çuar përpara procesin e Berlinit përmes marrëveshjeve që do të çojnë hap pas hapi në lehtësimin e të gjithë lëvizjes në rajonin tonë dhe finalizimin e Shengenit rajonal. BE -ja do të luajë rolin e saj mbështetës në këtë drejtim qoftë politikisht, por qoftë edhe financiarisht, sikundër e tha në Tiranë edhe vetë Presidenti i Këshillit Europian, Charles Michel”, – nënvizoi Rama.

Kryeministri Rama bëri të ditur se “dita sot vijon me detyrën e kryetarit të OSBE-së, në selinë e NATO-s dhe pasdite vonë do të kthehemi në Tiranë për të vazhduar të gjitha përpjekjet tona”.