AktualitetKosovaTë fundit

Apostolova: Ne nuk ndërhyjmë, por qeveria e Kosovës të bëhet sa më shpejtë

Shefja e zyrës së Bashkimit Evropian në Kosovë, Nataliya Apostolova, ka bërë të ditur se ndërkombëtarët nuk do të ndërhyjnë në çështjet e brendshme politike.

Sipas saj, ndërkombëtarëve nuk iu takon që të ndërhyjnë në procesin e formimit të qeverisë së Kosovës,.

“Kemi dëgjuar palët, nuk kemi advokuar për një zgjidhje të veçantë në takimin e mbrëmshëm me partitë që po negociojnë arritjen e koalicionit. Nuk na takon neve të ndërhyjmë”, ka deklaruar Apostolova, e cila shtoi se është e rëndësishme që sa më shpejtë të formohet qeveria e re.

Këto komente Aposotolova i bëri në takimin me ambasadoren e Kroacisë në Kosovë, Danijela Barishiq, ku paraqitën sot prioritetet e Presidencës së Kroacisë të Këshillit të Bashkimit Evropian.

Theksojmë se gjatë së martës, kreu i Lëvizjes Vetëvendosje, Albin Kurti dhe ai i Lidhjes Demokratike të Kosovës, Isa Mustafa, janë takuar me ambasadorët e shteteve të QUNT-it, me ftesë të Vetëvendosjes.

Në këtë takim ishte ambasadori i Britanisë së Madhe, Nicholas Abott, ai gjerman Christian Heldt, si dhe ambasadori italian, Nicola Orlando.

Ndërkaq, ambasadori amerikan, Philip Kosnett, nuk ka marrë pjesë, por e ka dërguar Jessica Long, e cila është këshilltare ekonomike dhe politike në Ambasadë. Ndërsa në këtë takim nuk ka marrë pjesë as ambasadori i Franëc, por që ambasada e Francës u përfaqësua nga zëvendësambasadori.

 

Fraksion.com