DW: Lufta kundër korrupsionit ka ngecur në vend

“Mungesa e përparimit të vërteta është zhgënjyese dhe ka një ndikim të thellë negativ mbi qytetarët në të gjithë botën”, tha Patricia Moreira, drejtore ekzekutive e TI. “Për t’i dhënë fund korrupsionit dhe për të përmirësuar jetën e njerëzve duhet të luftojmë më shumë lidhjet mes politikës dhe financave të larta.”

Vendet e G7 të përkeqësuara

Përmirësime të dukshme nuk vihen re as në vendet e mëdha të industrializuara. Përkundrazi: në katër nga vendet e G7 – Kanada, Francë, Britani e Madhe dhe SHBA – korrupsioni i perceptuar është rritur. Gjermania dhe Japonia mbeten në të njëjtin nivel. Vetëm Italia ka pësuar një përmirësim të vogël në krahasim me 2018-tën. Në indeks TI shpërndan çdo vit pikë nga zero (plotësisht e korruptuar) në 100 (pa korrupsion).

Danimarka dhe Zelanda e Re janë vendet me më pak korrupsion, sipas raportit për vitin 2019 (të dyja me nga 87 pikë), pasuar nga Finlanda (86), Singapori (85), Suedia (85) dhe Zvicra (85). Gjermania është ngjitur dy vende më lartë, në vendin e nëntë. Por ky nuk është ndonjë sukses i madh, pasi në të vërtetë numri i pikëve absolute ka mbetur i njëjti (80). Pra, ngjitja në klasifikim ka ardhur si pasojë e keqësimit të vendeve të tjera.

Ne Ballkanin Perëndimor korrupsioni në rritje 

Vendet e Ballkanit Perëndimor kanë pësuar rënie ne luftën kundër korrupsionit, përveç Malit të Zi (45) dhe Serbisë (39), të cilët e kanë ruajtur nivelin e vitit 2018. Të tjerët janë përkeqësuar: Kosova (36, në vitin 2018: 37), Bosnja-Hercegovina (36, në vitin 2018: 38), Shqipëria (35, në vitin 2018: 36) dhe Maqedonia e Veriut (35, në vitin 2018: 37).

E rëndësishme është të thuhet, se TI studion vetëm korrupsionin e perceptuar në biznes, politikë dhe administratë. Vlerësimet e vendeve individuale bazohen në anketimet nga ekspertë dhe menaxherë.

Korrupsioni dhe paqëndrueshmëria 

Somalia (9), Sudani (16), Siria (13) dhe Jemeni (15) janë në fund të listës. “Ne këto vende ka trazira, dhunë dhe luftë,” i tha DW-së, Marwa Fatafta, këshilltare e TI-së për Lindjen e Mesme dhe Afrikën e Veriut. “Kjo tregon qartë lidhjen midis korrupsionit dhe paqëndrueshmërisë.”

Afrika poshtë Saharës ka nivelin më të lartë të korrupsionit. Shkaku është se rajoni është i pasur me lëndë të para, por ndërmarrjet e huaja nuk i reinvestojnë fitimet e tyre në vend. “Si pasojë, nuk ka burime për kujdesin shëndetësor – dhe madje edhe më pak për të luftuar korrupsionin,”  thotë Mokgabo Kupe për DW. Ajo është Koordinatore e TI për Afrikën e Jugut.

Protestat janë një shenjë shprese

Edhe pse përparim nuk ka, pozitiv është fakti që njerëzit kanë filluar të sensibilizohen dhe po dalin në rrugë kundër korrupsionit dhe po bëjnë presion ndaj qeverive të tyre. “Jam shumë e sigurt që do të shohim ndryshime në të ardhmen”, tha Marwa Fatafta për DW. “Protestat tregojnë se njerëzit nuk do të heqin dorë së kërkuari të drejtat e tyre.”