Tridhjetë ditë paraburgim për gruan që doli kundër vrasjes së gjeneralit iranian

Gjykata Themelore në Prishtinë i ka caktuar 30 ditë paraburgim, Ikballe Berisha-Hudutit, e cila u arrestua nën dyshimet për shtytje në kryerjen e veprave terroriste.

“Ekziston dyshimi i bazuar se e pandehura I.H ka kryer veprën penale për të cilën dyshohet, ku dëshmohet postimi i të pandehurës në rrjetin social Facebook, e me të cilat postime është bërë shtytje në kryerjen e veprave terroriste”, thuhet në njoftimin e Gjykatës, në të cilin nuk bëhet i ditur identiteti i plotë i të pandehurës.

Gjykata, në njoftim thotë se “ekziston frika e bazuar se po që se e pandehura do të mbrohet në liri mund të arratiset për ti ikur përgjegjësisë penale para së cilës ndodhet”.

Dy ditë më parë, Policia e Kosovës e kishte arrestuar Ikballe Berisha-Hudutin, pasi e njëjta përmes rrjeteve sociale ishte deklaruar kundër vrasjes së gjeneralit iranian, Qasem Soleimani, gjatë një sulmi me dron nga Shtetet e Bashkuara të Amerikës.

Ikballe Berisha-Huduti, përmes një serie postimesh në llogarinë e saj në rrjetin social Facebook, kishte shprehur pikëpamjet e saj lidhur me vrasjen e Soleimanit, të cilin e kishte përshkruar si “njeri madhështor”.

Berisha-Huduti në njërin nga postimet në rrjetin social Facebook, kishte kritikuar Uashingtonin, pasi forcat amerikane vranë gjeneralin iranian, më 3 janar.

“Duke vrarë të zotin e shtëpisë, ju keni vrarë të gjithë familjen, andaj hakmarrja është e obligueshme, por nuk ka kufi”, ka shkruar Berisha-Huduti.

Postimi duket se është fshirë pas raportimeve nga mediat vendore në Kosovë.

Ajo kishte paralajmëruar padi ndaj mediave që e kishin cituar atë.

Fraksion.com