Sulme të tjera në Bagdad; Raketat iraniane bien afër ambasadës amerikane

Në atë të Erbilit ndërkohë ndodhej dhe kontigjenti italian, i sapozhvendosur nga Bagdadi pas protestës së dhunshme përpara ambasadës amerikane. Siç dëshmojnë dhe ata, sulmet nuk bënë viktima, ndryshe nga sa pretendonte media shtetërore iraniane. Këtë e pohoi më herët dhe Donald Trump, sipas të cilit edhe bazat vetë nuk kanë pësuar veçse dëme minimale. Çka bëri të lindte pyetja: a mos i shmangu qëllimisht Irani viktimat në radhët e amerikanëve. E normalisht, dhe të tjerëve bashkë me ta? A ishte thjesht ky një paralajmërim, që tregon se Republika Islamike kërkoi të tregonte dhëmbët, por nuk e dëshiron luftën e sigurt me SHBA-në?

Nga Washingtoni mbërritën sinjalet e para të forta të vullnetit për të çtensionuar situatën. Përmes një letre të dërguar në OKB, Shtetet e Bashkuara e justifikonin vrasjen e gjeneralit Kasem Sulejmani duke e përshkruar si “akt vetëmbrojtjeje”, por shtonin se janë të gatshme të angazhohen pa kushte në negociata serioze me Teheranin.

Për ambasadorin e Iranit në OKB, Majid Takht Ravanchi, ofertës amerikane për bisedime nuk i duhet zënë besë, aq më tepër kur Trumpi paralajmëroi sanksione të tjera të ashpra ekonomike mbi vendin e tij. Sakaq, ndërsa tentohet fashitja e tensioneve, dy raketa ranë pak përpara mesnatës pranë zonës së Gjelbërt në Bagdad, ku ndodhen ambasadat e huaja, si për të treguar se fitili i urrejtjes, është ndezur tashmë./TCH