Programi i Rindërtimit; Ahmetaj: Lehtësi fiskale për kompanitë, 1020 leje të miratuara për rikonstruksion

“Në mbështetje të rindërtimit kemi hartuar një paketë të plotë me lehtësi fiskale”, deklaroi ministri Ahmetaj gjatë mbledhjes së Tretë të Komitetit Kombëtar të Rindërtimit.

Sipas tij, kemi hequr Tatimin mbi Vlerën e Shtuar në ndërtim për kompanitë që do të ndërtojnë Brenda programit. Po ashtu ministry informoi këto kompani përjashtohen edhe nga taksa e ndikimit në infrastrukturë.

Ministri po ashtu informoi se brenda muajit janar do të jetë gati edhe raporti përfundimtar mbi faturën e dëmeve të shkaktuara nga tërmeti i fortë i mëngjesit të 26 nëntorit.

“Brenda janarit duhet të kemi draftin përfundimtar që kur të jemi duke diskutuar dhe duke iu afruar datës së konferencës së donatorëve të kemi draftin final”, u shpreh Ahmetaj.

Sipas tij, kjo është hera e pare në 30 vite që hartohet një plan i tillë. “Nuk ka ndodhur kurrë, është hera e pare në 30 vitet e fundit që një qeveri bën një plan të tillë. Vende si Greqia, Turqia dhe Italia i kanë bërë. Ne na u desh t’i bëjmë nga e para”, tha ministri.

Sipas tij, Durrësi ka nevojë për promovim në të gjitha aspektet, por edhe Lezha, Laçi dhe Tirana.

Duke u ndalur në procesin e pastrimit, ministri Ahmetaj informoi se Durrësi dhe Tirana janë pastruar krejtësisht, ndërsa edhe Thumana është drejt përfundimit. Ky proces, vuri në dukje ai, është bërë falas.

Ministri Ahmetaj theksoi po ashtu se janë miratuar rreth 1020 leje për rikonstruksion, pasi janë lehtësuar ndjeshëm procedurat për këtë proces.

Duke folur për vlerësimin e dëmeve, ministri Ahmetaj tha se sistemi i unifikuar i vlerësimit që po zbatojmë është një sistem bashkëkohor që na çon deri te qelizat më të vogla të dëmtimit në territor.