Gara elektorale në Britaninë e Madhe; Kandidojnë edhe të përjashtuarit nga partia Torie
Shumë anëtarë të partisë konservatore Torie të përjashtuar nga radhët e saj kandidojnë si të pavarur në zgjedhjet parlamentare. Ata nuk duan t’ia lenë të lirë fushën politike Boris Johnsonit.
Dhe arsyeja është Boris Johnson, kryeministri britanik. Në fushatën elektorale ai shpërndau ekipe kontrolli, kush nuk ndjek linjën e partisë dhe kursin e tij të Brexitit, përjashtohet. Ai nxorri gjithsej 21 deputetë nga grupi parlamentar, mes tyre edhe nipin e Winston Churchillit, ish-Prokurorin e Përgjithshëm dhe ish-ministrin e Financave. Anne Milton, ish-deputete e Partisë Konservatore thekson: “Ai u thotë njerëzve atë që duan të dëgjojnë. Puna është si të thjeshtësohen gjërat.” Edhe Anne Milton u përjashtua prej grupit parlamentar nga Johnsoni, sepse ajo është pro-europiane e bezdisshme për kryeministrin. Pas 27 vjetësh anëtarësimi në parti dhe shumë viteve si ministre. “E gjithë bota mendon se ne kemi humbur arsyen. Që një njeri i tillë, si një Trump i dytë të bëhet kryeministër. Një oportunist. Ai nuk beson në asgjë. Beson vetëm se i takon që të jetë kryeministër” ankohet Anne Milton.
Ndërkohë që Boris Johnson vazhdon të ngul kembë: “We will get Brexit done!”
Pretendimet e tij se është në gjendje të arrijë një marrëveshje me BE-në me një lëvizje gishti, janë gënjeshtër thonë kritikët.
Anne Milton nuk do që të jetë pjesë e kësaj politike dhe në zgjedhjet e ardhshme ajo kandidon si kandidate e pavarur. “Unë punoj pa u mbështetur nga ndonjë makineri partiake dhe jam krejt e pavarur. Zgjedhjet do jenë të vështira. Ekipi ynë është i vogël. Dhe im shoq më ndihmon po ashtu.”
Ann Milton dhe Philip Lee shpresojnë që zgjedhësit do dinë ta vlerësojnë kur politikanët dalin nga dara partiake, sepse integriteti është për ta më i rëndësishëm se karriera politike.
Anne Milton: “Në çfarë besoj unë vetë? Cili është vizioni im? Unë besoj tek një vend që është zemërgjerë, që bashkëpunon me vendet e tjera, që e kupton se krejt vetëm nuk mund të shkohet shumë larg. Kjo është linja ime.”
Philip Lee, deputet liberaldemokrat: “Pjesa më e madhe e njerëzve duan të kenë politikanë me parime. Atëherë nuk duhet të zgjedhin konservatorët. Sepse në krye të partisë së tyre nuk ndodhen ata që kanë cilësi të tilla. Unë i njoh ata personalisht.”
Parimet janë një gjë, votat e zgjedhësve një gjë tjetër. Philip Lee dhe Ann Milton e dinë që tani duhet të punojnë me dyfishin e forcave. Të arrish të futesh në parlament me një parti të vogël ose krejt i vetëm është shumë e vështirë dhe çdo votë ka rëndësi për ta.
Fraksion.com
