107-vjetori i Ushtrisë Shqiptare; Mesazhi i Metës: Falenderim dhe mirënjohje!era
Presidenti i Republikës, Ilir Meta, ka dhënë një mesazh për Forcat e Armatosura, që përvjetori i 107-të i gjen ata në krye të solidaritetit me qytetarët e dëmtuar nga tërmeti i 26 nëntorit. Me një postim në “Facebook”, Kreu i Shtetit ka postuar një video nga puna e FA-së në vatrat e tërmeti tragjik, ku dhjetëra qytetarë humbën jetën dhe qindra të tjerë mbetën të plagosur.
“Falenderim dhe mirënjohje për kontributet e vyera, përkushtimin heroik dhe sakrificat sublime për mbrojtjen e Atdheut dhe Sigurisë Kombëtare, për operacionet humanitare e paqeruajtëse, si dhe për garantimin e lirisë, paqes e stabilitetit kudo në botë, nën flamurin e NATO-s”, shkruan në facebook presidenti Ilir Meta me rastin e 107-vjetorit të Ushtrisë shqiptare.
Postimi i Metës
Me konsideratat më të larta, ju shpreh sot urimet më të ngrohta të gjithë burrave dhe grave në uniformë të Forcave tona të Armatosura, me rastin e 107-vjetorit të Ushtrisë Shqiptare!
Falenderim dhe mirënjohje për kontributet e vyera, përkushtimin heroik dhe sakrificat sublime për mbrojtjen e Atdheut dhe Sigurisë Kombëtare, për operacionet humanitare e paqeruajtëse, si dhe për garantimin e lirisë, paqes e stabilitetit kudo në botë, nën flamurin e NATO-s.
Ky 107-vjetor, i gjen Forcat tona të Armatosura, në krye të solidaritetit dhe ndihmës për vëllezërit e motrat shqiptare të prekur rëndë nga pasojat e tërmetit tragjik, duke spikatur me profesionalizmin, përkushtimin dhe dashurinë për të shpëtuar banorët e mbetur nën rrënojat e kësaj fatkeqësie natyrore shkatërrimtare, që nxorri në pah dhe domosdoshmërinë e modernizimit të mëtejshëm të ushtrisë shqiptare.
Zoti i bekoftë ushtarakët shqiptarë!
Lavdi dëshmorëve që dhanë jetën për Atdhe dhe Flamur! 🇦🇱
Fraksion.com
