Shpërndante drogë në shkolla; Arrestohet një person në Tiranë

Zbulohet një rast i shpërndarjes së lëndës narkotike në kryeqytet, duke vënë në pranga një person.

Efektivët e komisariatit nr.2 në kryeqytet, në bazë të të dhënave të mbledhura në rrugë operative se një person po shpërndante kanabis sativa në afërsi të shkollave, kanë organizuar punën duke bërë identifikimin dhe lokalizimin e personit të dyshuar.

Në rrugën “Kongresi i Lushnjës”, gjatë kontrollit fizik, policia i gjeti 27 doza me lëndë narkotike, shumën prej 63 500 lekësh të reja dhe një telefon celular, të cilat u sekuestruan në cilësinë e provës materiale.

Në përfundim të veprimeve, nga specialistët për hetimin e narkotikëve u bë arrestimi në flagrancë i V. M., 25 vjeç, banues në Tiranë.

Lidhur me këtë ngjarje hetimet janë në vijim, ndërkohë që materialet iu referuan Prokurorisë së Tiranës, për veprën penale “Prodhimi dhe shitja e lëndëve narkotike.

Fraksion.com