Basha-Plenkovic: Presidenca e BE nga Kroacia në Janar 2020, lajm i mirë për Shqipërinë

Kryetari i Partisë Demokratike Lulzim Basha po merr pjesë në Kongresin e Partive Popullore Europiane që nis sot punimet në Zagreb,vendi më i ri anëtar i BE-së, i cili merr presidencën e radhës për herë të parë në Janar 2020.

Basha zhvilloi një takim me kryeministrin e Kroacisë, Andrej Plenkovic, ku u shpreh se “Presidenca e BE nga Kroacia në Janar 2020 është një lajm shumë i mirë për Shqipërinë dhe gjithë rajonin”.

Basha shton se “për Shqipërinë nuk ka dhe nuk mund të ketë alternativë tjetër veç integrimit në BE dhe për këtë, Partia Demokratike dhe unë jemi të vendosur të ndërmarrim çdo vendim dhe hap të nevojshëm. Zbatimi i drejtë i reformës në drejtësi, reforma zgjedhore dhe zbatimi i saj sipas udhërrëfyesit gjerman, garantojnë shtetin e së drejtës, ndan  politikën nga krimi, i jep fund pandëshkueshmërisë, dhe garanton zgjedhje të lira e të ndershme”.

“Me mikun tim dhe të shqiptarëve diskutuam hapat për kapërcimin e  krizës politike në vend, e cila konsiderohet nga vendet anëtare të Bashkimit Europian si pengesë serioze për nisjen e bisedimeve të anëtarësimit të Shqipërisë në Bashkimin Europian”, u shprehet ai.

Gjithashtu Basha shton se “ramë dakord të koordinojmë veprimet dhe vendimet tona për të realizuar të gjitha detyrat e shtëpisë dhe për të mundësuar hapjen sa më parë të negociatave.   Kryeministri Plenkovic më garantoi se Kroacia do të vijojë të jetë avokate e fuqishme e Shqipërisë në procesin e anëtarësimit në BE”.