“Ligj special ndaj anëtarëve të KÇK-së”; Rama: Ofensive frontale ndaj krimit të organizuar

Kryeministri Edi Rama deklaroi sot se “në një hark kohe jo të gjatë do të çojmë në parlament edhe disa masa speciale ndaj anëtarëve të KÇK-së (Kap ç’të kapësh) “.

Duke u ndalur tek problemi që hasin qytetarët në gjykatat e vendit gjatë aktivitetit të përjavshëm të platformës së bashkëqeverisjes, Rama tha se “nuk mund të them më shumë për momentin, por të jeni të sigurt më herët se vonë të gjithë do të shohin në praktikë jo në fjalime rezultatet e një ofensive frontale që qeveria do të ndërmarrë qoftë ndaj krimit të organizuar, qoftë ndaj KÇK-së”.

“Sot vazhdon të jetë e vështirë shpeshherë e pamundur të mendosh së mund të shkosh në gjykatë dhe ta zgjidhësh problemin. Pasi sot ne jemi në kushtet kur ka nisur pastrimi i sistemit të drejtësisë, i cili kërkon kohën e vetë dhe ndërkohë shumë nga xhakajdurët që janë në sistem dhe e dinë vetë ata që nuk e kanë kaluar filtrin e Vetingut, pra që do t’i kapi fshesa janë lëshuar “Kap çfarë të kapësh”, KÇK-së”, – theksoi Rama.

Kreu i qeverisë u shpreh se “KÇK është organizata me rrezikshme kriminale që vepron sot në Shqipëri sepse është e veshur me petkun e ligjit dhe funksionon si organizatë grabitësish ordinerë. Për KÇK-në ne po bëhemi gati dhe sikundër e kam lajmëruar lidhur me krimin e organizuar paralelisht me një ligj special për ta çuar luftën kundër krimit të organizuar në një nivel të pandodhur më parë dhe me rezultate absolutisht të garantuara”.

Gjithashtu, Kryeministri u ndalur edhe tek problemet me Kadastrën për sa u përket pronave. Kreu i Ekzekutivit theksoi se ligji special që do të propozohet në Kuvend do të shërojë plagët në Kadastra sidomos në zonat e bregdetit.

“Ligji special do të shërojë edhe kadastrën e Durrësit. Masat speciale kundër KÇK do ta çlirojnë përfundimisht Kadastrën e Durrësit dhe gjithë kadastrat në Shqipëri, nga rrethimi kriminal që ka nisur prej shumë vitesh dhe që ne kemi arritur ta çajmë vetëm pjesërisht, sidomos në zonat që kanë interes zhvillimi turistik, aty ku krimi i organizuar përpiqet të shpëlajë paratë e pista, por nuk do t’i gëzojë. Çfarë kanë grabitur, nuk do ta gëzojnë”, tha Rama.