“Refuzon shpërblimin monetar”; Greta Thunberg: Lëvizjes klimatike nuk i duhen çmime
Aktivistja suedeze e klimës, Greta Thunberg refuzoi të pranonte një çmim për mjedisin që vinte me shpërblim monetar, duke thënë se lëvizja klimatike ka nevojë që njerëzit e veshur me pushtet të dëgjojnë zërin e saj, e nuk i duhen çmimet.
Ajo ka refuzuar të pranojë një çmim prej 40,000 paundësh, që i është dhënë së fundmi nga Këshillit Nordik 2019.
Në një postim të sajin në mediet sociale, Thunberg shprehet se njerëzit nuk kanë nevojë për çmime por për njerëz në fuqi që dëgjojnë shkencën.
Gjimnazistja ishte nominuar si nga Suedia, ashtu edhe nga Norvegjia për përpjekjet e saj në mbrojtje të mjedisit. Megjithatë, një përfaqësues i saj tha se vajza nuk ka ndërmend ta pranojë çmimin që shkon në gati 52 mijë dollarë. Vetë Greta, ndërsa e falenderoi këshillin Nordik për nderim e jashtëzakonshëm që i bëri, nuk la pa i kritikuar vendet e atij rajoni duke thënë se nuk janë ngritur në nivelin e “reputacionit të tyre të jashtëzakonshëm” përsa i takon çështjeve të klimës.
“Fjalë të bukura ka shumë”, u shpreh aktivistja, “por kur vjen puna tek emetimet dhe dëmi ekologjik për person, ajo është krejt tjetër histori”.
Fraksion.com
