“Pagoi me euro false”; Kapet 41-vjeçari pasi mbushi makinën me karburant

Një 41-vjeçar është vënë në pranga të policisë në qytetin e Vlorës pasi dyshohet se ka mbushur automjetin e tij me karburant duke paguar me euro false. Sipas policisë, ngjarja ka ndodhur  ditën e sotme në autostradën Levan-Vlorë, ku drejtuesi i mjetit tip “Audi” i ka paguar punonjësit të karburantit  shumën prej 100 eurosh, të cilat dyshohet se janë të falsifikuara.

Mbush automjetin me karburant kundrejt pagesës me euro false, vihet në pranga nga policia 41 vjeçari. Më datë 05.10.2019, në një karburant përgjatë autostradës Levan-Vlorë drejtuesi i një automjeti ka mbushur me karburant Audin e tij, duke i dhënë punonjësit të karburantit kartëmonedhën me prerje 100 euro.

Pas hetimeve të kryera nga ana e Seksionit të Hetimit të Krimeve Ekonomike dhe Financiare pranë Policisë së Vlorës, ka rezultuar se kjo kartëmonedhë dyshohet të jetë e falsifikuar.

Në vijim të veprimeve proceduriale, Policia ka bërë identifikimin, kapjen dhe arrestimin e drejtuesit të mjetit dhe vendosjen para përgjegjësisë penale të 41 vjeçarit E.P., banues në Vlorë. Materialet iu referuan Prokurorisë në ngarkim të tij për veprën penale “Falsifikimi i monedhave”.

Fraksion.com