Aksident i rëndë në aksin Elbasan-Peqin, 4 të vdekur dhe 2 të plagosur

Tragjedi në aksin Peqin- Elbasan. Aksidenti ka ndodhur pranë fshatit Papër. Raportohet se tre makina janë përplasur me njëra-tjetrën. Kanë ndërruar jetë pas aksidentit katër persona.

Nga përplasja makinat ishin dëmtuar aq rëndë, saqë u desh shërbimi zjarrfikës për të nxjerrë disa nga të plagosurit. Makina më e dëmtuar ku ndodheshin edhe personat që humbën jetën drejtohej nga shtetasi me iniciale G.K.

Fillimisht nga 6 të plagosurit ka ndërruar jetë gjatë rrugës për në spital një vajzë 25-vjeçare. Vajza ka ndërruar jetë rrugës për në spitalin e Elbasanit.

Të plagosurit e tjerë u transportuan fillimisht për në spitalin e Elbasanit, për të marrë ndihmën e parë. Por më pas ata u nisën drejt Tiranës në gjendje të rëndë. Raportohet nga burime zyrtare se edhe tre persona të tjerë ndërruan jetë gjatë rrugës.

Dy të plagosurit e tjerë pas ndihmës së parë në spital, mësohet se janë jashtë rrezikut për jetën. Lagështira dhe ecja tej normave të lejuara dyshohet nga hetimet e para si shkak i këtij aksidenti tragjik.