30 forca zjarrëfikëse në terren për zjarri në Lurë: Nis lokalizimi i flakëve
Zjarri i rënë në Pregj, Lurë, që para tre ditësh, ka dëmtuar një sipërfaqe të konsiderueshme pyjesh të larta me pisha.
2 banesa (kulla) u shkrumbuan plotësisht, ndërkohë janë rrezikuar 6 të tjera . Nuk ka patur rrezik për banorët pasi janë larguar dhe janë strehuar tek të afërmit . Nga Shtabi i Emergjencave të prefekturës bëjnë me dije se po monitorohet situata dhe janë gati të evakuojnë edhe banorët e 6 banesave të tjera , por për momentin duket se ka një rënie të intensitetit të flakëve .
Sipas Shtabit të Emergjencave, në terren po punojnë 30 forca zjarrfikëse dhe 15 ushtarë , por ndërhyrja ka qenë e vështirë pasi transmetimi i zjarrit është bërë në lartësi në kurorat e pishave dhe jo përtokë .
Gjatë gjithë ditës është pritur ndërhyrja nga ajri por nuk është bërë e mundur ende , por gjatë mbrëmjes zjarrëfikësit dhe banorët kanë mundur ti lokalizojnë flakët duke prerë breza pishash , dhe duke hapur korridore , çka ka bërë të ndërpritet avancimi më tej dhe tani vazhdon djegIa e brendshme .
Megjithëse flakët janë vënë nën kontroll , ende ka rrezik për disa banesa të fshatit Vlashe./tch
Fraksion.com
