“788 zyrtarë të ndëshkuar”; Rama: Nuk u janë përgjigjur si duhet qytetarëve

Kryeministri Edi Rama ka deklaruar sot në takimin e bashkëqeverisjes,  se rreth 788 zyrtarë që nga drejtor e deri tek specialistë që janë ndëshkuar pasi nuk janë përgjigjur si duhet qytetarëve.

“Kemi kaluar 50 mijë adresime në platformën e bashkëqeverisjes, më e rëndësishmja është që jemi në afro 115 mijë përdorues dhe janë shumë për një periudhë të shkurtër kohe”, u shpreh Rama.

Rama tha se, “më shumë duhet të bëhen për të patur më shumë ndërveprim me njerëzit dhe sa më shumë suksese në përpjekjen e përbashkët, për të zgjidhur problemet e tyre, dhe ne për të përmirësuar situatën në ato pika ku shfaqen problemet”.

Rama deklaroi se, “janë 788 zyrtarë që nga drejtor e deri tek specialistë që janë ndëshkuar. Janë ndëshkuar pikërisht pasi nuk janë përgjigjur si duhet qytetarëve. Sot një njeri i zakonshëm nuk ka nevojë për mik, për parti dhe as duke u lodhur duke shkuar e duke ardhur në një zyrë, mjafton t’i drejtohet platformës dhe jo vetëm merr të drejtën, por edhe ndëshkon. Ndëshkon atë individë që i bëhet pengesë dhe e ndëshkon dhe drejtë sepse ligji e ndëshkon atë individë, por që ligji ta ndëshkojë duhet që çështja të bëhet publike”.

“Pra duke e adresuar çështjen në instancën më të lartë, jo duke heshtur e duke pritur por duke bërë thjesht dhe vetëm detyrën ndaj vetes merr atë që të takon”, përfundoi kryeministri Edi Rama