“Në fund të betejës’; Basha në Prrenjas: Rotacion politik dhe fundi i tranzicionit

“Në fund të kësaj beteje nuk do të ketë vetëm rotacion politik por do të jetë fundi i tranzicionit”, deklaroi sot kryetari i Partisë Demokratike, Lulzim Basha, në takimin me strukturat e PD-së në Prrenjas.

Basha tha se bashkë me 85% të shqiptarëve që duan ndryshim për t’i hapur rrugë standardit të vërtetë europian.

“Ne e dimë që në fund të kësaj rruge nuk do të kemi vetëm rotacion politik por do të kemi fundin e tranzicionit dhe Partinë Demokratike në krye të aleancës sonë qeverisëse për të hapur rrugën e standardit të vërtetë europian, për të bërë realitet Shqipërinë e standardit europian në çdo fushë. Largimi i Edi Ramës është kusht i parë dhe i panegociueshëm. Vetëm një qeveri tranzitore mund të garantojë votën e qytetarëve”, – u shpreh Basha.

Basha nënvizoi se farsa e 30 qershorit është nul dhe deklaroi se PD dhe opozita do jenë në krah të qytetarëve për të mbrojtur pushtetin lokal nga uzurpimi antikushtetues i tij.

“Ne do të qëndrojmë së bashku, me të gjitha format dhe mënyrat, në krah të qytetarëve, për të kundërshtuar me të gjitha format dhe mënyrat uzurpimin e dhunshëm të pushtetit vendor.  Ne nuk pranojmë kurrë këtë uzurpim antikushtetues dhe antiligjor”, –  tha ai.

Duke folur për situatën ekonomike në vend, Basha tha se PD ka gati planin dhe programin për të kthyer besimin e shqiptarëve tek qeverisja.

“Jemi të vendosur që shumicën “Rama ik” të 30 qershorit ta kthejmë në forcën e ndryshimit që kërkon çdo shqiptar. Ne do të mundësojmë hapjen e mijëra vendeve pune në sektorë të pashfrytëzuar deri më sot, me paga dinjitoze për rininë shqiptare dhe zhvillimin ekonomik.

Fraksion.com