“6% po uzurpon qeverisjen lokale”; Basha reagon për Devollin: Pushteti i paligjshëm
Kreu i opozitës, Lulzim Basha ka reaguar për situatën e krijuar në bashkinë e Devollit, ku kryebashkiaku i ri i PS, Eduard Duro ka hyrë në zyrë pavarësisht kundërshtimit të Partisë Demokratike dhe ish-kryebashkiakut Bledion Nallbatin.
“Pushteti i paligjshëm i 6% po uzurpon me dhunë qeverisjen lokale, kundër vullnetit të popullit. Ky regjim kriminal dhe plaçkitës po hyn në rrugën e verbër të përplasjes me popullin e tij. Sot hajdutët në pushtet ndjehen të mbrojtur se kanë polici speciale, gaz lotsjellës dhe mercenarë, por nesër do të kenë fatin që meritojnë hajdutët dhe banditët”, shprehet Basha.
Ndërkohë në Devoll ka shkuar edhe ish-deputeti demokrat, Ervin Salianji, i cili ka deklaruar se kryebashkiaku Duro do të kallëzohet për përvetësim të titullit.
“Personi i vetëshpallur si kryebashkiak dhe që zaptoi zyrat do të kallëzohet edhe për përvetësim të titullit. Qytetarët nuk po tërhiqen në mbështetje të kryetarit Nallbati, i cili është i ligjshëm, por edhe institucionit i cili sot nuk është publik. Sot këtu nuk ofrohet shërbim publik për shkak të kryeministrit i cili e trajton Shqipërinë si pronë private. Ne do të jemi në mbështetje për shkak të kërcënimeve që bëhen nga ana e administratës dhe policisë ndaj qytetarëve”, u shpreh Salianji.
Mëngjesin e sotëm u organizua një protestë nga Partia Demokratike përpara bashkisë, ndërsa një numër i lartë i forcave të policisë u vendos aty për të shmangur çdo incident të mundshëm.
Fraksion.com
