SHBA përgëzon Kosovën për hartimin e listës së të përfshirëve në akte terroriste
Këshilltari amerikan për Sigurinë Kombëtare, John Bolton, përmes një postimi në rrjetin social twitter, përgëzoi Kosovën për vendimin që të hartojë listën e personave, grupeve dhe organizatave të përfshira në akte terroriste, të cilat do t’u nënshtrohen masave kufizuese në territorin e vendit.
Zoti Bolton shkroi se “Shtetet e Bashkuara përgëzojnë përcaktimin e Kosovës që ta cilësojë Hezbollahun si një organizatë terroriste. Ky zgjatim terrorist iranian vazhdon të kërcënojë qëndrueshmërinë në Lindjen e Mesme dhe në gjithë botën. Bota po njeh mbështetjen terroriste të Iranit dhe emërtimin e përfituesit kryesor të tij: Hezbollahun”, shkroi zoti Bolton.
Dekreti i presidentit që hyn në fuqi menjëherë, kërkon nga institucionet vendase të sigurisë që deri te hartimi i listës, Kosova të zbatojë listën e Bashkimit Evropian të personave, grupeve dhe organizatave të përfshira në akte terroriste, që është rifreskuar në janar të këtij viti.
Në listën e Bashkimit Evropian për zbatimin e masave specifike për luftimin e terrorizmit gjenden 21 grupe apo etnitete dhe 15 persona.
Dekreti u mbështet nga sekretari amerikan i shtetit, Mike Pompeo, i cili shkroi dy ditë më parë po ashtu se “Shtetet e Bashkuara mirëpresin përcaktimin e Hezbollahut si organizatë terroriste nga autoritetet e Kosovës.
“Hezbollahu me mbështetjen e Iranit vazhdon të organizojë sulme në Evropë. U bëj thirrje të gjithëve t’i bashkohen Kosovës dhe të ndalin këtë grup terrorist që të financojë operacionet e përgjakshme”, shkroi sekretari Pompeo.
