Rudina Hajdari pas deklaratës së Ambasadës Amerikane: Ndihem krenare që do ta udhëheq reformën zgjedhore

Rudina Hajdari, kryetarja e grupit demokrat në parlament ka reaguar mbrëmë në Facebook me një status lidhur me Ambasadën Amerikane e cila ndër të tjera mirëpriti raportin e OSBE/ODIHR me konkluzionet se zgjedhjet bashkiake të 30 qershorit u zhvilluan përgjithësisht në mënyrë të qetë dhe të rregullt, si dhe u dha një vlerësim i përgjithshëm pozitiv për numërimin e votave.

Rudina Hajdari shprehet se reforma zgjedhore është një fitore për një pjesë të opozitës që ruajti vlerat e demokracisë përpara bashkatdhetarëve dhe partnerëve ndërkombëtar. Si kryetare e Reformës Zgjedhore, Hajdari thotë se ndihet e privilegjuar dhe krenare që do e udhëheqë për tu dhënë demokratëve sistemin më të mirë të përfaqësimit, si një mënyrë për të avancuar drejt Europës.

Lexoni më poshtë reagimin e Rudina Hajdarit e cila citon edhe fjalët e ambasadës Amerikane:

“Përshendesim deklaratën e Ambasadës të Shteteve të Bashkuara të Amerikës për mbështetjen absolute të Reformës Zgjedhore. Reforma Zgjedhore është një fitore për atë pjesë të opozitës që ruajti vlerat e demokracisë përpara bashkatdhetarëve dhe partnerëve ndërkombëtarë, duke treguar vendosmëri për të respektuar shtetin e së drejtës dhe institucionet e tij, si dhe duke mos braktisur elektoratin dhe parimet demokratike. Ndihem e privilegjuar dhe krenare që do ta udhëheq këtë reformë për tu dhënë demokratëve sistemin më të mirë të përfaqësimit, në mënyrë që të avancojmë drejt rrugës Europiane.“

Fraksion.com