AKU bllokon në Morinë 400 kg kafe dhe 22 tonë qumësht pluhur nga Serbia

Autoriteti Kombëtar i Ushqimit ka bllokuar dy ngarkesa produktesh me kafe dhe qumësht pluhur në pikën e Inspektimit Kufitar Morinë.

Nga kontrolli i ushtruar në një ngarkesë me 375 kg nisur nga Kosova me qëllimin për t’u tregtuar në Shqipëri, inspektorët e AKU-së gjatë kontrollit në kufi kanë konstatuar se produktit i kishte mbetur afat përdorimi më pak se gjysma (1/2) e jetëgjatësisë dhe për rrjedhojë nuk plotësonte kërkesat ligjore të parashikuara në pikën 2 të Urdhërit Nr.250, datë 29.07.2011 “Mbi disa masa për hyrjen në territorin e Republikës së Shqipërisë të produkteve ushqimore” dhe si e tillë nuk ishte e përshtatshme për konsum.

Në bazë të legjislacionit në fuqi, AKU nuk lejoi futjen e këtyre produkteve në territorin e Republikës së Shqipërisë dhe ngarkesa me këtë produkt ushqimor u kthye në vendin e origjinës.

Ndërsa nga kontrolli i ushtruar në praktiken e importit të një ngarkesë me 21 600 kg qumësht pluhur nisur nga Serbia me qëllimin për t’u tregtuar në Shqipëri, inspektorët e AKU-së në kufi kanë konstatuar se importuesi nuk është i licencuar për shitje me shumicë të ushqimeve me origjinë shtazore për konsum human (nuk ka licencën përkatëse për aktivitetin me Kod II-1B).

Në bazë të legjislacionit në fuqi, AKU mori marrën masa administrative të bllokimit të sasisë prej 21.6 tonë qumësht pluhur me urdhëroi kthimin e produktit në vendin e origjinës.

Fraksion.com