BE: Palët të ulen për dialog, protesta të jetë paqësore

Delegacioni i Bashkimit Europian në vendin tonë dhe Ambasadave të Shteteve Anëtare të Bashkimit Evropian i kanë bërë apel partive politike shqiptare që të mbështeten në ofertën ekzistuese për dialog. Pak orë përpara protestës së 6-të kombëtare, Delegacioni dhe Ambasadat anëtare të Bashkimit Europian në Tiranë theksojnë se, dënojnë aktet e dhunës që kanë ndodhur në protestat e mëparshme, ndërsa u bëjnë thirrje udhëheqësve të protestës si dhe autoriteteve shqiptare që të sigurojnë që demonstrata e sotme të zhvillohet në mënyrë të rregullt dhe paqësore.

“Delegacioni i Bashkimit Europian dhe Ambasadat e Shteteve Anëtare të Bashkimit Europian në Shqipëri respektojnë plotësisht të drejtën themelore të qytetarëve të Shqipërisë për të demonstruar. Megjithatë, ne përsërisim rëndësinë e ushtrimit të kësaj të drejte në mënyrë paqësore”, lexohet në deklaratë.

“Ne dënojmë aktet e dhunës që kanë ndodhur në protestat e mëparshme dhe u bëjmë thirrje udhëheqësve të protestës si dhe autoriteteve shqiptare që të sigurojnë që demonstrata e sotme të zhvillohet në mënyrë të rregullt dhe paqësore. Të gjitha palët e përfshira kanë përgjegjësinë për të garantuar sigurinë e atyre që janë në rrugët e Tiranës sonte. Nuk ka vend për dhunë në një protestë paqësore. Autoritetet e zbatimit të ligjit kanë përgjegjësinë për të vepruar me vetëpërmbajtje, edhe nëse provokohen”, theksohet më tej.

“Për të mirën e qytetarëve shqiptarë, shumica e të cilëve dëshiron të shohë që vendi të bëjë përpara me procesin e reformave dhe të ecë drejt anëtarësimit në Bashkimin Europian, ne i bëjmë thirrje të gjitha palëve të mbështeten në ofertën ekzistuese për dialog me synimin për të gjetur një rrugëdalje nga situata aktuale politike si një çështje urgjente”. përfundon deklarata.

Fraksion.com