Vakancat në Kushtetuese: KED ndalon 5 kandidatë, 5 të tjerë tërhiqen

Këshilli i Emërimeve në Drejtësi vendosi përfundimin e procedurës së verifikimit, vlerësimit, pikëzimit dhe renditjes së kandidaturës për 5 kandidatë dhe ndalimin e kandidimit për 5 kandidatë të tjerë, në vendet vakante ekzistuese për Gjykatën Kushtetuese.

Në mbledhjen e djeshme, KED shqyrtoi rastet e kandidatëve të tërhequr nga kandidimi, për vendet vakante për Gjykatën Kushtetuese si dhe gjetjet e deritanishme në procedurën e verifikimit të disa prej kandidatëve për vendet vakante për Gjykatën Kushtetuese dhe atë të Inspektorit të Lartë të Drejtësisë.

Këshillimi i Emërimeve në Drejtësi, pasi shqyrtoi procedurën e ndjekur për verifikimin e kandidaturës dhe aktet përkatëse për shprehjen e vullnetit për tërheqje nga kandidimi dhe për ndalimin për kandidim mbi bazën e korrespondencës me ILDKPI për mosdorëzimin në afat të deklaratave të pasurisë sipas ligjit (brenda 15 ditëve), ka vendosur përfundimin e procedurës së verifikimit, vlerësimit, pikëzimit dhe renditjes së kandidaturës për 5 kandidatë dhe ndalimin e kandidimit për 5 kandidatë të tjerë, në vendet vakante ekzistuese.

Lista e kandidatëve të tërhequr nga kandidimi, për të gjitha pozicionet: Alban Brati, Irena Reso, Theodhori Sollaku, Genci Ismaili, Avni Shehu.

Lista e kandidatëve të ndaluar nga kandidimi: Ardita Alsula, Denar Biba, Kristaq Traja, Vasil Bendo, Kostandin Kazanxhi.

Vendet vakante në Gjykatën Kushtetuese pritet të jenë të plotësuara brenda qershorit të këtij viti.

Fraksion.com