Bushati: Basha nuk fiton zgjedhjet në shtëpinë e tij; Nuk bëhet kryeministër duke hedhur bomba ruse molotov drejt institucioneve të shtetit shqiptar

“Lulzim Basha hedh bomba ruse molotov drejt institucioneve të shtetit shqiptar, ndërsa kur ndodhej brenda tyre qëlloi dhe vrau protestuesit në Bulevard”, deklaroi sot deputeti i Partisë Socialiste, Ervin Bushati.

“Lulzim Basha gjithë jetën e tij ka votuar në të njëjtën kuti, QV1929: që kur la lindur në shtëpinë e prindërve të tij, me të njëjtët komshinj të cilët e njohin mirë që prej vitit 1974, këtu në Njësinë 8 në Tiranë. Në zgjedhjet 2017, ai mori vetëm 33% të votës së komshinjve të tij që e njohin që fëmijë: pra ka humbur në shtëpinë e tij. Mos harrojmë që kjo është një lagje që votonte historikisht djathas: që kur u bë Basha kryetar, PD nuk fiton më aty”, tha Bushati.

Po ashtu Bushati theksoi se “në zgjedhjet 2017, në QV1929 ditën e votës, komisionere të PS-së ishin 3 studente ekselente. “As banda dhe as kriminelë, por 3 vajza që ja ulën kokën kryetarit të PD, pikërisht pak metra nga ku ka lindur e është rritur. Këto vajza janë makthi i Bashës?”, vijon Bushati.

Sipas tij, “PS mori +61 vota më shume se PD datën 25 qershor 2017”. “E ftoj Bashën të gjejë cila bandë i vodhi zgjedhjet pikërisht në shtëpinë e tij. Ai pretendon më kot se bandat dhe grupet kriminale i kanë vjedhur votat. E quan jolegjitime Kuvendin që doli nga zgjedhjet me demokratike të mbajtura ndonjëherë, standardet e së cilës i garantoi vetë duke patur në drejtim gjithë institucionet më të rëndësishme në vend”, tha Bushati.

Duke vijuar më tej, deputeti socialist, shprehet se “Basha dështoi kur ishte pjesë e qeverisë, dështoi kur ishte në krye të Bashkisë Tiranë, por sot rrezikon seriozisht të ardhmen e Partisë Demokratike, duke e tërhequr poshtë fatin e saj si “Parti e Dhunës” në rrugë”.

“Nuk duhet harruar se, mandati i deputetit është kontrata me popullin për të përfaqësuar interesat e tij në Kuvend. Protesta e sotme nuk tregon as përgjegjegjshmëri dhe as përmbajtje”, tha ai

 

Fraksion.com