“Do ju çoj në burg”; Shkarkohet nga detyra, prokurori i Sarandës
Komisioni i Pavarur i Kualifikimit, ka shkarkuar sot nga detyra kreun e Prokurorisë në Sarandë, Edison Ademi.
ILDKPI ka konstatuar më herët se subjekti kishte deklarime të pasakta, ndërsa rezultonte të kishte fshehje të pasurisë, si dhe të jetë kapur në konflikt interesash.
Në përfundim të seancës së sotme, prokurori Ademi replikoi me trupin gjykues dhe tha se “Do të përballeni me mua, kjo punë nuk mbaron këtu. Mbajeni mend po nuk iu çova në burg.”
Ademi ka deklaruar se ka në pronësi një apartament banimi 130 m2 në Vlorë, të blerë në vitin 2012 për 45 mijë usd.
Si burim të ardhurash ai ka paraqitur shitjen e një banese të prindërve dhe një kredi 30 mijë usd. Kjo pasuri është deklaruar rregullisht nga subjekti. Por ka pasur paqartësi për një apartament banimi në lagjen “1 maji” në Vlorë të porositur tek “H shpk” në 2002, por që është prishur në vitin 2003. Nuk është deklaruar në 2003.
Nga hetimi rezultoi se subjekti ka pasur mundësi për blerjen e pasurisë 45 mijë usd. Ai rezulton të ketë blerë sende dhe mobilje me një vjerë prej 800 mijë lekësh, për të cilat nuk është deklaruar në deklaratën e vettingut.
Në 2005 rezulton që ka marrë kredi 700 mijë lekë për mobilim. Analiza financiare tregon se shuma është e justifikuar. Rezulton të ketë deklaruar edhe një automjet “Benz” në vitit 2004, të cilin thuhet se e ka shkëmbyer me një mjet të vitit 2003.
Po në deklaratat periodike subjekti ka deklaruar në vitin 2012 një “Benz” me vlerë 800 mijë lekë. Rezulton se nuk ka pasur mundësi ta blejë. Subjekti ka deklaruar se e ka pasur dhuratë nga vëllai, me kontratë noteriale.
Në vitin 2007 është deklaruar një “Opel” 155 mijë lekë. Subjekti nuk ka pasur mundësi financiare për blerjen. Po ashtu nuk rezulton i deklaruar një mjet “Golf” 1 mijë euro.
Ai ka deklaruar edhe 3 llogari bankare, për të cilat nuk ka dyshime. Këtu përfshihet një shumë 10 mijë euro cash, kursime dhe emigracion.
KPK ka konstatuar se subjekti nuk ka paraqitur prova për të ardhurat e ligjshme të vëllait 2003-2015. Subjekti ka pretenduar se shpenzimet e vëllait janë më të ulëta se standardi i llogaritur nga ILDKPI dhe KPK.
Lidhur me të ardhurat e përfituara nga vëllai në vitin 2016 subjekti ka paraqitur dokumente.
Në deklaratën e vettingut subjekti ka paraqitur dhe qiramarrjen e një sipërfaqeje prej 5 mijë m2 në Nartë, Vlorë, me një kontratë 99 vjeçare, mes tij dhe Komunës qendër, Vlorë.
Sipas KPK në këtë rast ka konflikt interesi. Subjekti ka paguar të gjitha detyrimet e kontratës.
Ligji ndalon prokurorët të lidhin kontrata me subjekte publike. Subjekti ka pretenduar se në tokën e marrë me qira nuk janë kryer investime dhe nuk gjendet në kushtet e konfliktit të interesit.
Fraksion.com
